旺角不嬲都係「街邊太多人與車」。難得波鞋街開咗間新商場，裡面仲有間裝修好似個小綠洲咁嘅東南亞餐廳。坐喺玻璃窗邊一邊望住綠色植物擺設，一邊嘆各款精緻又有Gimmick嘅菜式，成個Package係舒服嘅。
 

開飯仔之前已經介紹過商場裡面首推蒲燒鰻魚飯嘅MOS Cafe同有素食版街頭小食嘅Green Common，今次就介紹呢間門口已經夠搶眼嘅青花。睇埋餐廳英文名就會發現原來由做開西餐嘅ATUM主理，今次搞搞新意思做東南亞菜，當中以泰國菜為主，又加入一啲西餐元素，將辣度減低啲，菜式賣相亦精緻啲。
 

行到攰坐定不如先嗌返杯嘢飲？呢度嘅蝶豆青檸茶一大壺上枱，分量足夠2-3人開心Share。按自己喜好將青檸汁加入去，蝶豆花茶就會由藍色變成紫色，有得飲又有得玩。最值得一讃嘅係特別加入青瓜汁調味，令成碗茶Refreshing得嚟唔會得個酸字。
 

鐘意重口味啲嘅就可以嗌呢杯三色冰奶蓋，顧名思義即係將泰式三色冰上面加上芝士奶蓋。但開飯仔試過覺得就算唔搞勻，呢杯三色冰嘅口感都比一般嘅厚身，問過先知原來用咗Coconut Cream，難怪咁香滑呢。
 

再嚟一份沙律開開胃，梅子椰糖西瓜沙律嘅主角之一當然係醃過嘅多汁西瓜，但另一主角就係旁邊紅色嘅梅粉，點埋嚟食酸酸甜甜咁。靈感係嚟自泰國人會將青木瓜加梅粉當街頭小食，消暑一流。
 

輪到主菜，呢碟燒菠蘿蟹肉炒飯夠哂大堆頭，菠蘿切成細細塊容易食得多。而黃薑咖喱炒飯亦經過改良，味道比一般咖喱炒飯甜少少，更容易入口。加埋蟹肉、提子乾、肉鬆同焗腰果，口感同味道都相當豐富。
 

而泰式蛋花咖喱大頭蝦一樣分量十足，蝦身夠大食落啖啖肉，加埋咖喱汁夠惹味，又唔會有平時食紅肉咁Heavy嘅感覺。
 

如果你鐘意甜品當正餐嘅話，喺All-Day Breakfast Menu當中就有呢份竹炭格子窩夫配鮮果及雪糕，黑色竹炭窩夫上面放咗水果、爆谷、雪糕同色彩繽紛嘅龍鬚糖。最出色嘅係中間球菠蘿口味雪糕，菠蘿香味突出又唔會過於甜膩。略嫌窩夫唔夠脆同唔夠蛋香，但有咁多唔同配料加返分，都係值得推介嘅。
 

甜品胃仲有位嘅話，仲有呢份椰皇雪芭，雪芭用椰子裝住，食完上面嘅清甜雪芭後，可以挖埋裡面嘅椰子肉嚟食㗎。
 

餐廳占地唔算大，但半開放式設計同落地玻璃窗令環境感覺開揚。綠色擺設、雲石枱同金色凳啱哂相機食先嘅Foodie，亦增加一份清新感，身處旺角都可以有種喺花園Hea緊嘅感覺！

青花
旺角奶路臣街17號The Forest 1樓107-108號舖

文、相、片：Cathy