睇嚟繼 #又係日本之後， #又係旺角 可以成為最受歡迎嘅tag喇！呢個平民掃街福地又開咗新舖頭，賣台灣小食呀！咁梗係唔少得芋圓啦，仲要係有餡嘅芋圓呀，好少食到㗎。

呢間台灣小食店，舖內大部分嘅食物都係由台灣送港，包括最受歡迎嘅芋圓。一碗綜合芋圓28蚊，可以揀仙草底或者剉冰底，面頭就有芋圓啦、地瓜圓啦、紅豆啦、芋泥啦等等，再淋上黑糖漿。就咁睇個樣已經好吸引，但食落先發現原來仲有驚喜！

啲芋圓地瓜圓全部都有餡㗎，一款係芋頭皮蕃薯餡、一款係蕃薯皮芋頭餡，一款就係芋頭皮芋頭餡，令到成粒圓嘅味比平時食開嘅更香濃更突出，唔會好似淨係咬緊粉咁。

台灣小食就有胡椒餅、芋頭酥、麻辣鹽水雞等等，胡椒餅同芋頭酥都喺烘櫃度拎出嚟，仲係熱㗎。兩款都好真材實料，入面啲餡好滿下。胡椒餅嘅豬肉同蔥等等都好香口，胡椒味幾重，都有啲辣嘅感覺；不過芋頭酥就略嫌唔夠酥化，裡面嘅芋蓉就芋味十足，甜度亦適中。

新台場台灣小食
地址：旺角廣華街1號仁安大廈地下24A號舖

文、相：Kar