有質素嘅壽司唔係只出於日本老師傅之手，旺角呢間新開嘅親民價壽司小店，由擁有12年高級Omakase經驗嘅90後坤師傅創辦兼主理。佢希望大家喺度食到特別得嚟又平價啲嘅款式，為食客帶嚟更多新鮮感。食材每日由日本直運到港，更選用日本富山縣天特A級天盛米加上秘製赤醋，製作Omakase常用嘅赤醋飯。事不宜遲，即刻睇下有咩時令壽司啦！
活北寄貝壽司（$48/件）
呢度嘅壽司由最抵食嘅三文魚（$9）起跳，不過嚟得小店當然搵啲冇咁大路嘅時令款式啦。好似活北寄貝壽司喺坊間比較少見，雖然落咗主餐牌，但都要睇貨源質量，所以唔一定食到㗎。活北寄貝面頭灑咗少少青檸柚子，令味道保持鮮甜又有清新感，而且爽口肉厚令人好滿足。
銀鱈魚壽司（$48/件)
京燒煮法嘅銀鱈魚食得多，有冇諗過可以整成壽司呢？銀鱈魚壽司有刺身同火炙版，呢款魚含豐富魚油，輕燒後逼出油脂令口感更香滑，有別於京燒味道濃重嘅感覺。
左：鹿兒島春子鯛壽司（$48/件）｜右：江戶前沙甸魚壽司（$98/件）
店內有塊黑板寫而家嘅時令菜式，開飯仔當日就有鹿兒島春子鯛壽司同江戶前沙甸魚壽司。春子鯛係真鯛嘅魚BB，一條魚只係開到4件壽司，而家啱啱入季，係夏天魚壽司嘅代表作；肉質軟腍中帶少少爽口，加咗青檸柚子令本身嘅鮮甜味道更突出。試過淡口味嘅壽司就到濃味紅肉魚喇！近年多咗人食沙甸魚壽司，呢份都幾大件，落咗少少蔥蓉略微加添清新感。
時令限定Sushi Téng套餐（$328)
有選擇困難嘅朋友可以揀主打時令限定Sushi Téng套餐，入面包含壽司8貫、御料理、吸物同兩道甜品。除咗海膽壽司同吞拿魚腩壽司係必備款式，其他壽司都由廚師發辦挑選最當造嘅時令食材。而套餐配搭嘅吸物野菜豆乳湯（單點$38）都用心製作，湯底用木魚熬煮，加入日本濃郁豆乳同新鮮蔬菜，比一般豆乳湯濃味。
壽司方面，開飯仔當日有鮮帶子、甜蝦、真鯛、日本白海膽、大吞拿魚腩、油甘魚、池魚同火炙銀鱈魚壽司，橫跨廣受歡迎同高級款式，配搭都幾用心。熟食嘅八爪魚煮到入晒味，亦好腍身。
甜品係固定款式，有小熊造型最中餅同自家製櫻花水信玄餅，前者嘅紅豆大大粒；後者嘅櫻花處理過所以略帶鹹味，配黑糖汁一齊食都幾夾。
腐皮烏冬（$88）
除咗壽司，呢度亦有熟食丼飯同烏冬套餐。腐皮烏冬聽個名好齋？其實配咗日式炸雞2件、吉列生蠔2件同吉列炸蝦反卷1客。雞肉同生蠔都炸得啱啱好，外脆內裡juicy，加埋足料反卷，食晒都幾飽。
而家新張期間消費滿$80，加$1就食到海膽三文魚籽拖羅蓉手卷，面頭仲有食用金箔點綴，用料一啲都唔hea！
藤
地址：旺角廣華街1號仁安大廈地下24A號舖
文、相：Cathy.C