又係時候去滾啦！最新話題火鍋店係旺角呢間台式火鍋放題，唔單止有九款特色湯底任揀，更有多款台灣產配料，例如三星蔥爆漿貢丸、虱目魚丸、手工肉羹等，當然唔少得高質肉類包括澳洲M5和牛、花雕醉雞。更有台式小食自助區，供應蛋餅、台灣腸、鹽水雞、鹽酥雞等，連芋圓同台式飲品都係任食任飲啊！
 

午市$158起、晚市$238起任食

「厝內人．吃台北」火鍋放題

好呷台灣火鍋由株式会社開設，同牛角、温野菜屬於同一集團，不過今次就主打台式火鍋。午市100分鐘任食$158起，晚市120分鐘任食$238起，套餐分為4個唔同Level：「探部落．吃台東」、「輕旅行．吃台中」、「麻吉遊．吃台南」、「厝內人．吃台北」，分別標示咗提議享用人數同有咩當地特產，例如一個人可以揀「輕旅行．吃台中」，Menu當中會有台中特產手工肉羹。
 

九款台風特色湯底

好呷麻辣鴨血藥膳鍋、好呷酸菜白肉鍋（鴛鴦鍋+$50，附送自家人參沾醬及麻香辣醬）

由有超過30年經驗嘅師傅研發出九款湯底，當中麻辣鴨血藥膳鍋同酸菜白肉鍋都係推介。麻辣鴨血藥膳鍋同多款香料同藥材熬製，香麻濃郁、辣味適中唔嗆喉，而且食到淡淡藥膳甘甜味。開飯仔知道餐廳亦研究緊，之後可能能夠自選辣度啊。而酸菜白肉鍋嘅酸味得宜，開胃之餘又唔會蓋過食材原味。另有清甜椰子雞鍋、牛奶木瓜美顏鍋等。
 

輕奢華盛盤必食手切牛

輕奢華盛盤（「厝內人．吃台北」獨有，分量按人數而定，圖為二人份）

最高級嘅「厝內人．吃台北」當中嘅厝內人係家人咁解，最啱一家大細一齊分享，更會奉上輕奢華盛盤，當中會有手切牛．外裙肉、澳洲M5和牛肩胛、鮑魚、蠔、蝦等海鮮、台灣水蓮同時令蔬菜。手切牛嫩滑帶嚼勁，而台灣水蓮口感非常爽脆！
 

任食鍋物推介

花雕醉生雞件、澳洲M5和牛肩胛、榖飼牛．封門柳

香港人打邊爐愛食牛肉，呢度嘅任食肉類中首推近年大熱嘅封門柳，有指係全隻牛當中肉味最濃嘅部位，脂肪唔多但肉質軟嫩。而澳洲M5和牛肩胛口感就較為扎實，肉味同脂香平衡。另一推介係花雕醉雞，醃得非常入味，食落酒香好出。
 

配料選擇多元化，（前排左至右）分別有海鮮（孔雀蛤、墨魚仔）、台式配料（鴨血、三星蔥爆漿貢丸、蝦丸）、鍋物（麻辣芫荽雞滑、沙茶墨魚滑、魚籽蝦滑）同（後排）時令蔬菜等

叫得台式火鍋，當然有唔少台式配料選擇，有點麻辣鴨血藥膳鍋嘅話可以揀返鴨血，口感Q彈而且非常吸湯。丸同滑類都有驚喜，三星蔥爆漿貢丸真係食得出三星蔥嘅清香，而麻辣芫荽雞滑係坊間少見嘅雞肉滑，麻辣惹味。
 

台式夜市小食任夾任食

熱食櫃有多款酥脆小食

推介包括古早蛋餅、蔥油餅、鹽酥雞，麻香辣味爆米花同甘梅爆米花

嚟到小食自助區真係特別興奮，感覺好似去咗台灣夜市咁，超多小食任揀！特別介紹餐廳特製嘅兩款爆谷：麻香辣味爆米花同甘梅爆米花，一款香辣超級一款微酸醒胃，作為開胃小食就最啱。部分小食包括台灣腸、蔥油餅等更從台灣直送到港，係正宗寶島風味啊。
 

任飲珍珠奶茶+冷泡茶

飲品、小食自助區

杯裝珍珠奶茶同樽裝冷泡茶同樣任飲，更可以+$30/位升級至台灣啤酒放題！

台灣名物珍珠奶茶可以任飲，有芋香珍珠奶茶同黑糖珍珠奶茶兩款口味。想Refresh啲可以飲手工冷泡茶，包括白桃烏龍、桂花烏龍、茉香綠茶等，清新解渴。或者一班朋友要盡興，可以升呢台灣啤酒放題呀。
 

餐廳佔地約4,000平方呎，設卡座及VIP房

好呷台灣火鍋
地址：旺角亞皆老街8號朗豪坊7樓17-20號舖
放題Menu及價錢詳情：https://bit.ly/3NW4N2a

文：Cathy.H
相：Sunny