各位鍾意食甜品嘅人類，旺角有間日式CAFÉ今日起推出「日本及抹茶甜點放題」呀！有超過十款甜品選擇㗎，由雪糕、芝士撻到蛋糕咩都有！是咪好想即刻瘋狂去甜幾甜呢？

想享受個甜品放題，都有少少條件嘅，首先當然係你要唔怕肥啦（誤），同埋要叫咗個主食先，飯呀意粉呀或者waffle等等都得，之後就可以加$69任食日本同抹茶嘅甜品啦~ 餐廳最近出咗個新主食，係豐西和牛漢堡扒窩夫 Burger 配紅酒提子汁，每日限量50份咋！用上日本和牛，肉味濃郁啲，配微酸嘅紅酒提子汁，有助消膩添，要食多幾款甜品都唔係問題。同埋，反正你哋食甜品，都係用第二個胃㗎啦，可？

到你哋嘅正餐，主角甜品出場啦，超過十款選擇。

抹茶流心芝士撻記得要趁熱食，中間真係流心㗎，好香口。

芝士控唔好錯過同樣有芝士香嘅原味芝士焦糖布甸燒同原味芝士蛋糕。前者甜到入心，而後者則感覺輕盈。

抹茶千層蛋糕嘅班戟皮食落有微微蛋香同抹茶甘香，不過就好多忌廉囉科科。

抹茶Opera 細細件，兩三啖就食晒，應該唔會佔你好多quota嘅。

青森直送蘋果批啲蘋果好甜呀！批底亦酥脆。

甜品放題又點可以冇雪糕？仲要係餐廳嘅招牌抹茶Cremia 雪糕！配埋嶡餅食又得，好軟滑。

想light啲，食多幾款嘅，芝士奶蓋抹茶布甸、抹茶紅豆班戟、日本直送抹茶嶡餅、抹茶紅豆大福都諗得過。

想飲下嘢嘅都得，另加$28可以配手調飲品，好似呢杯顏色咁靚靚嘅，就係加咗碟豆花同雪梨醬嘅特飲，有種清甜感覺啊。

山下菓子
地址：旺角彌敦道700號T.O.P This is Our Place 3樓315號舖

文、相、片：Kar