過完年要繼續食好啲！嚟到2、３月份自助餐推介，有東南亞主題、「芝」味海鮮主題同港式大排檔主題等，間間都好有gimmick～

「繽紛嚐味東南亞」自助餐 普慶餐廳   

以東南亞風味為主題，炮製出超過二百款滋味菜式同甜點，好多元化！除咗常見嘅海鮮冷盤，今次更推出多款東南亞海鮮菜式，包括波士頓龍蝦配以十款醬汁，另有泰式青檸蒸魚、蕉葉參巴醬烤魚同越式粉絲蟹煲。當然唔少得日韓美食，如韓式烤魷魚、日式吉列蠔，重有本土風味嘅椒鹽鮮魷同避風塘蟹鉗！自助餐更首次推出即席炮製牛肉他他專區，將牛肉他他混合特色醬汁，酸甜開胃。 甜品區包括芒果黑糯米飯、紅豆綠茶卷蛋、越式千層糕等，真係好似去咗唔同地方旅行咁～

供應時間：由2024年2月19日起 

臻「鮮」盛宴自助晚餐 8度餐廳     

全新海鮮主題自助餐！首先有每日兩款空運到港嘅法國、美國或愛爾蘭即開新鮮生蠔，鮮甜飽滿。而現場即製專櫃，包括煎鵝肝伴黑松露汁同鮑汁花膠配香煎帶子，前者用慢火將鵝肝煎至微微金黃色，入口即溶，再配上黑松露汁一解油膩感；後者嘅帶子鮮味十足，配埋花膠同鮑汁鮮上加鮮。熟食重有香草白酒煮海鮮、薑蔥炒龍蝦、清蒸鮮鮑魚同椒鹽軟殼蟹等。

供應日期：即日起至2024年4月30日

紅楚蟹‧海鮮自助晚餐 City Café   

呢間就以嚟自北海道嘅時令紅楚蟹同多種海鮮食材作主題，每人會有一客蒜蓉牛油焗北海道紅楚蟹腳伴日式柚子醋汁，將紅楚蟹腳加入蒜蓉、牛油同白葡萄酒炒香後烤焗，配合柚子醋汁作為開胃菜～另有紅楚蟹腳冷盆、即製紅楚蟹鮮蜆粥、蘭花蚌墨西哥牛油果醬脆撻、紅楚蟹海鮮意大利飯，以及黑松露野菌焗扇貝，海鮮控一定鍾意。甜品就有蜜糖抹茶梳夫厘、朱古力心太軟、紅草莓蜂蜜芝士蛋糕、紅草莓蜜糖沙巴翁等。

供應日期：由2024年3月1日至3月31日

「香港特色大牌檔」自助午餐及晚餐 咖啡廳  

港式鑊氣小炒唔係淨係大牌檔先有得食啦～呢間餐廳將一部分區域化身成本地大排檔，好有香港風味！豉椒炒花甲鮮甜惹味，鑊氣十足；金沙黃金蝦肉質鮮嫩彈牙，散發香濃鹹蛋香氣；椒鹽鮮魷入口酥脆，更供應一系列廣東點心，如蜜汁叉燒包、小籠包、蝦餃皇同鮮蝦燒賣等。晚餐時段每位成人更可獲贈開邊新鮮龍蝦一隻𠻹！甜品都好地道，有楊枝甘露布甸、阿華田蛋糕卷等。

供應日期：即日起至2024年4月30日

「粵．嚐．食」海鮮自助晚餐 Alva House  

主打粵菜嘅自助餐，款款都係誠意之作～迷你佛跳牆將花膠、鮑魚、瑤柱，雞件同雞腳筋分別燜煮至入味軟腍後，再配以用鮮雞、豬骨熬煮嘅高湯燉成，湯頭清澈鮮味。龍蝦鮑魚粥則由新鮮蝦頭熬製而成，再配上龍蝦鮑魚更加鮮甜。水煮龍躉片以新鮮龍躉炮製成，香辣惹味又鮮嫩。甜品都好特別，陳皮老薑雪糕精選遠年陳皮配以老薑搾製嘅薑汁，入口散發陣陣陳皮香氣同埋微辛嘅薑香～

供應日期：即日起至2024年3月24日

「芝」味狂歡海鮮盛宴自助晚餐 灣景廳   

以芝士海鮮做主題，聽到都心心眼呀～其中芝士焗花雕醉鮑魚，鮑魚以秘製花雕醉湯汁冷浸至入味，然後鋪上一層厚芝士再焗，酒加芝士原來咁夾～另有芝士焗龍蝦、法式芝士焗田螺、威靈頓三文魚配雙重芝士及芝士火鍋等。甜品就必試流心巴斯克芝士蛋糕同榴槤芝士撻，榴槤控唔可錯過呀～

供應日期：2024年3月1日至31日

文：Yanica
編：Cathy