近年有唔少素食自助餐興起，無論係中式、日式定西式都大把選擇。觀塘新開呢間素食自助餐就以港式懷舊風作主題，唔單止裝修，大部份食物都係走港式風格，有五十幾款選擇，同時亦會寫明食物係屬於蛋奶素定純素等種類，咁就唔怕食錯啦～而且下午茶時間$48就食到啦！

餐廳設有單人座位，一個人嚟食都唔怕尷尬。

餐廳有供應唔少坊間素食比較少供應嘅選擇，如呢個麻辣口水鷄，用大豆纖維製成素雞，再加入麻辣醬及豆瓣醬等調味，夠晒惹味。

大蝦芝士焗伊麵用素芝士忌廉煮成，味道一樣香濃，而且仲無咁易漏添。

黑松露炒蛋刈包用蒸籠存放，確保食嗰陣一定熱辣辣。麵包軟熟，黑松露味都幾出吓。

茄汁焗豬柳飯用菇類代替豬柳，加入大量蕃茄及芝士，味道濃郁。

仲有好多其他選擇㗎～如素腐皮卷、滷水拼盤、紅油青瓜及炆茄子等等，都好有港式風味。

另外有蒸腸粉、荷葉飯、麵包布甸、港式碗仔翅及用蓮藕製成嘅沙拉骨，選擇真係幾多元化。

炸物都有好多款，特別啲有炸秋葵。

甜魔都唔使驚，除咗有傳統中式糖水紫米露及蕃薯糖水外，仲有港式糕點馬拉糕、白糖糕及米通等，最後當然唔少得西式甜品啦！

時段價錢： 

星期一至五 午餐 $68 (大小同價) 

星期六日及公衆假期 午餐 $98 (成人) $68 (小童) 

星期一至五 下午茶 $48 (大小同價) 

星期一至四 晚餐 $108 (成人) $78 (小童) 

星期六日及公衆假期 晚餐 $138 (成人) $88 (小童)

素街  

地址: 觀塘駿業街56號中海日升中心1樓B號舖

文、相、片: Yanica