米芝蓮街頭小食－麥記美食
Photos by 搵食能手 & 技巧樹熊
知你哋排完隊睇Show都用咗幾個鐘，未想行咁遠，咁就去呢間轉個彎就到嘅老麥，放心喎，唔係快餐店咁無新意，呢間麥記美食雖然細細間好樸素，但舊年就攞咗米芝蓮街頭小食殊榮，呢度食物款式好多，最出名就係上海包點，無論蔥油餅、生煎包、鍋貼都係自家製，材料都係師傅每日到附近北角街市入貨，為咗保持肉質鮮嫰唔過老仲堅持生煎，製作需時，蔥油餅仲要3點先有得賣，另外魚蛋、墨魚、燒賣等小食都好受歡迎，食家都推介佢哋嘅秘製魚蛋醬，甜甜辣辣好滋味！
Fusion新派素食－素食.分子
Photos by 2vonanana& karriech
睇完呢個展真係唔使驚無嘢食，喺Gallery隔幾個鋪，就有呢間走簡約風嘅素食餐廳，用嘅都係無無公害蔬菜，除咗佛堂素菜食譜，仲有好多中西日亞洲素茶，如多日式麻醬豆腐、日式煎餅、芒果糯米飯、南瓜意大利飯、墨西哥薄餅等，特別推介黑松露蘑菇包，個包整到成個蘑菇咁，入面就有好多鮮白菌粒同薑絲，仲有黑松露香，好軟熟多汁。
大啖Chill食Burger－The Big Bite
Photos by New Come & lizabeth
行遠少少（約多兩三個字），可以考慮呢間美式裝修嘅小店，尤其呢度開到夜晚11點，10點睇完Show仲趕到Last Order，首選當然係Burger，牛肉有咬口，牛味濃郁有油分，配合生菜和洋蔥少咗油膩感，而且份量好大個，另一必食係水牛城雞翼（$54/6 隻），雞翼炸到脆一脆，再包上以白醋、牛油、辣椒醬溝成嘅汁，甜甜地辣辣地好惹味，小心會上癮，辣都有6個Level，可以好似譚仔咁挑機，之後平日星期二嚟仲正，因為星期二係雞翼夜，買啤酒可以瘋狂加$3食雞翼。
不醉無歸小炒王－東寶小館
Photos by g-g-ay& 迷你黑洞
假如你約咗成班Friend去睇Show，北角名物東寶就啱你，一來坐到多人，二來熟食中心唔怕你哋嘈，三來開到零晨12點半，夠晒時間吹水， 呢度有兩樣嘢出名，出名到日本雜誌都介紹過，一當然係小菜，炸南乳豬手皮彈酥脆，風沙雞考功夫要先塗蜜糖吊乾再炸，大肚婆炒飯乾身多料，瀨尿蝦炒蛋配多士新奇，仲有招牌墨汁墨魚丸意粉，墨魚汁超多，墨丸新鮮爽彈；第二就係老闆，佢會同食客用戰鬥碗勁飲，亦會表演跳舞，喺度食飯氣氛會好熱鬧，包你成日都好High。
港島都有高質沾麵－俺之沾麵專門店
Photos by tiffytaf& littlebreadkitchen
如果你一丁友，六、七點地睇完，可以去炮台山站附近嘅一條橫街，有間得4張枱嘅餐廳仔，淨係單一賣沾麵，每日限賣150碗，專到一個點。原來呢度係香港沾麵先驅，深水埗「隱家」 嘅老闆開，水準當然有返咁上下，佢哋有一台舊式嘅製麵機整出好有蛋味又彈牙，粗度似烏冬嘅沾麵，有得揀中粗麵定極粗麵，亦有大小份量揀，湯底方面豬骨湯底長時間熬製，好濃味，加入鰹魚同北海道昆布更香，濃味怪就更加要試黑蒜油湯，入面有大量生蒜同炸蒜，另外番茄豚骨湯底微辣都開胃。上枱嗰陣，沾麵同湯係分開兩碗上嘅，啲配料就浸埋喺啲湯度，首先將沾麵沾沾啲湯，然後先食。如果想再食到豚肉嘅鮮味多啲，就可以加柚子醋。食晒啲麵之後，就請店員加湯，係加魚湯呀，中和返原本略鹹嘅湯底，咁就可以成碗乾咗佢喇！
巷仔抵食青藏麵食－青藏牛肉麵
Photos by ringow& cfung426
一講食牛肉麵多數人都係諗起台灣，但其實西藏嗰邊都有佢哋風格嘅牛肉麵，估唔到香港都食到，主打羊肉同牛肉麵，湯底用咗好多斤牛骨同香料熬製，非常濃郁，好有牛味，上面加上好多莞茜（鍾意嘅就覺得超香，唔鍾意記住走青），麵條都係人手打，滑口好煙韌，羊肉同牛肉好多好薄，全部吸晒湯底味道就好入味，與青藏水平有得揮，另外亦有串燒，不過始終都係麵食最出色，而且大大碗都係約$40，好抵食。
誠意意式小店食自製雲吞意粉－Villa Villa
Photos by Beanie Foodie& 國際為食專家 & Handsome XO
喺牛肉麵同一條巷行前幾步就有呢間由幾個出身酒店同西餐廳嘅80後廚師開嘅意大利菜小店，必試就係佢哋全人手製嘅意大利雲呑，皮韌勁有咬勁，包上濃香煙煙燻芝士汁，仲有得拉芝，加埋煎到微香嘅帆立貝，一流，不過整一次要成4個鐘，所以一日限定20份，想食就要預訂。另一特別係墨魚汁薄餅，又係自家出品，每塊Pizza都好薄鬆脆，帶有撲鼻嘅墨魚香，仲有好多食家推介黃金薯條，用鹹蛋同牛油炒過，食到你停唔到口，呢度價錢都算大眾化，每人消費約二百幾蚊，可以話用平民價食到高級意菜。
展覽詳情 日期：6月17日（周五）至26日（周日） 地點：Connecting Space Hong Kong(北角堡壘街18-20號華健大廈地下) 入場費: HK$50 (包括抽獎一次，有機會贏取限量版插晝一幅及紀念品) 活動FB： http://bit.ly/1LDFyzX
文:Marcus
隨時接收最新資訊
讚好OpenRice專頁！