將軍澳終於喺「美食沙漠」名單除名，加上海濱長廊又成為打卡界嘅 新寵兒，而家已經成為大家假日活動嘅熱門地點之一。喺單車徑旁有間裝修以搶眼橙色為主題嘅餐廳新開業，原來係由人氣甜品店HeySoNuts 同精釀啤酒店Once You Go Craft團隊開設，集合多國菜+甜品+精釀啤酒+咖啡於一身。主題顏色靈感源於老闆們都好鍾意嘅電影《迷幻列車》，門口特設長椅打卡位，加上半開放式嘅設計，無論係日頭嚟嘆咖啡，抑或夜晚嚟飲返兩杯，chill指數都頗高。
口水炸雞
除咗可以喺度搵到HSN同OYGC嘅招牌菜式外，亦有一系列新店特有嘅新菜。必須要推介佐酒一流嘅口水炸雞，雞肉以四川醬醃製過，慢煮最少兩個鐘後，再先後以低溫油同高溫油炸香，外層脆卜卜，內裡雞肉依然滑嫩，而且仲呈淡淡粉紅色。點埋餐廳混合大紅袍花椒、青花椒、 甜胡椒粉、花椒油同蛋黃醬等自家調配嘅辣雞醬，就辣得更有層次，麻香辛辣會慢慢滲出，最後留有餘韻。
娘惹蟹肉咖喱配蒜蓉包
不過如果講辛辣程度，口水炸雞只係BB級，想打大佬嘅要揀娘惹蟹肉咖喱配蒜蓉包。呢度菜式源自新加坡，由曾獲米芝蓮一星嘅餐廳Candlenut嘅招牌蟹肉咖喱演變而成。大廚參照秘方再略略作出調改，更迎合香港人嘅口味，以椰奶同爆香過嘅蒜再煮成咖喱，食到陣陣清甜椰香，絲絲蟹肉沾滿惹味刺激嘅咖喱辣香，層次豐富，辣勁後勁凌厲，更能吊出海鮮鮮味。配上香脆蒜蓉包，係會令人有種明知好辣但又停唔到口嘅衝動。
伯爵茶忌廉梳乎厘班戟
甜品選擇都好多，有麻糬窩夫有心太軟有奶凍等等，但最多人鍾意嘅應該係梳乎厘班戟啦~ 即叫即製嘅嘅梳乎厘班戟口感軟盈鬆軟，既有空氣感但又唔會得陣風，以日本蛋製作，蛋香味當然十足。選配嘅伯爵茶忌廉亦滿滿茶香。
蘋果金寶千層酥
另一肥仔推介則係賣相吸引嘅蘋果金寶千層酥，酥皮做得酥脆，富牛油香，連埋香甜蘋果蓉食係一種幸福感嚟，如果肥，都係幸福肥（誤）。
dirty
飲品方面，有啡有酒。咖啡務實唔花巧，主力供應black coffee同white coffee。漸層嘅dirty，以凍奶撞熱啡，啡味甚濃，奶香從後滲出。
House IPA
12個Tap頭中，主力供應多款本地精釀啤酒，由cider、lager到IPA等都有得揀，同時亦有外國酒款。嚟到當然要飲下OYGC嘅House IPA啦，清爽帶果香。嚟緊仲會有款加入咗蝶豆花嘅紫色啤酒！不過當然，如果唔太了解精釀啤酒嘅朋友仔，呢度好歡迎大家試一小杯，先再決定想要嘅口味呀。
GoNuts.
地址: 將軍澳唐賢街29號藍塘傲格林威治村地下4A號舖
文、相、片：Kar