唔使飛都食到喇～東京人氣現烤手工漢堡扒，下星期二（5月7日）正式登陸中環！香港店跟足日本做法，以及品嚐新鮮現烤理念，只設堂食。餐廳細心指引進食三步曲同醬料配搭，加埋維港海景，感覺好relax。

7°C凍房即製「挽肉」

店名「挽肉」嘅日文意思，可以解作漢堡扒，亦可以解作漢堡扒塑型時嘅拍打動作。而店內設有氣溫約7°C嘅凍房即製挽肉，令漢堡扒保持外型同唔會變色。

漢堡扒加入洋蔥等食材，增加味道同口感層次

漢堡扒用100%日本產牛肉製作，一件為90g，而餐牌只設一個分量嘅套餐（HK$138），每份為三件漢堡扒（可按件追加），配味噌湯、可無限追加嘅日本白飯，以及生雞蛋1隻。

餐廳設有2個烤爐，抽風系統幾好，唔會覺得悶焗

漢堡扒用小烤板烤至略為定型，就會轉做網烤，每件大約烤20分鐘

進食三步曲

第一步

想豐富啲可以加配小菜，有免治牛肉薯仔沙律同泡菜兩款（各HK$35/份）

大門設有自助點餐機，點餐後直接將票根交畀師傅就完成落單程序喇。漢堡扒會逐件上，放喺座位前嘅網架，而第一件建議趁熱放上飯面，讓白飯吸收肉汁，然後直接品嚐原味。

漢堡扒口感鬆軟juicy，仲帶微微油香𠻹

第二步

第二件開始配醬料

第二件會附上新鮮蘿蔔泥同自家製柚子醋，以解油膩感。柚子醋嘅酸度適中，不過樽口好容易倒出醬汁，要小心啲先唔會落太多。

第三步

MOU先生的特製麻辣粉（左）同豆拌醬油（右）

最後一件梗係用醬料調配個人口味啦！餐桌面嘅配料架提供8款選擇，開飯仔推介大家試「MOU先生（食品研發負責人）的特製麻辣粉」同豆拌醬油，前者唔會太辣，後者則鹹度適中，加入生雞蛋中打成汁，再淋上飯面，香氣更突出。

白飯用時令日本米即煮，仲可以無限追加，建議淋DIY蛋汁前先追加熱辣辣嘅白飯

飲品必試生薑梳打（右｜HK$35），想少酌一番亦有威士忌梳打（中｜HK$58）等選擇

挽肉と米
地址：中環金融街8號國際金融中心商場4樓4011號舖

文：Cathy
相、片：Yan Yan