餃子控注意喇！荃灣最近新開一間餃子店，係人氣小菜館楚撚記大排檔嘅新line，店舖正正位於楚撚記嘅地面，暫時只做外賣生意，可以買煎好嘅同生餃都得，不過好快就會有埋堂食㗎喇～餐廳主要供應創意煎餃、手工點心及老火靚湯，每日新鮮人手製作，誠意滿滿！

香煎潮汕韮菜粿（$10/個）

韭菜粿係潮汕特色小食，香氣濃郁嘅韭菜餡配上煙韌嘅皮～呢度嘅水晶皮同樣做得煙韌有厚度，而且於韭菜餡內加入蝦米增加鮮味，令味道生色不少！

手工水晶包（$8/粒）

水晶包都係自家手工製作，外皮同樣做得出色，皮薄晶瑩剔透，餡料就有四個選擇，包括抺茶、紫薯、奶皇及麻蓉，抺茶香甜回甘，麻蓉芝麻香氣突出，唔會過於甜膩～除咗水晶包，仲有傳統蓮蓉餡及新派奶皇餡嘅壽包選擇！

自家製餃子（$30/6隻）

餐廳一共供應十款口味嘅餃子，款款都皮薄餡靚，而且口味都好特別，坊間比較少見，配埋自家製辣醬、辣菜脯及陳醋食仲正～好似韓式泡菜牛肉餃，帶有泡菜嘅辣同酸，惹味得嚟好開胃，食多幾隻都無問題。黑松露什菌餃加入蘿蔔及木耳等食材，最重要係黑松露味好突出～

另外一款較特別有蝦米香菇翠玉瓜豬肉餃，爽脆嘅翠玉瓜配上有咬口嘅蝦米及冬菇，口感好豐富，蝦米亦令成隻餃更有鮮味，味道清新。

西洋菜鮮蝦豬肉餃嘅蝦肉爽口彈牙鮮甜，再帶有淡淡嘅西洋菜香氣，比例恰到好處；東北京蔥羊肉餃羊味都幾濃，啱晒鍾意食羊嘅朋友～

餃撚店

地址: 荃灣川龍街118號百悅坊地鋪

文: Yanica

相、片: Calvin