水炊鍋又名「博多煮」，源於日本九州福岡，因其油份極 少又健康好味嘅雞湯而聞名，相信唔少人去日本九州嘅時候都食過～最近中環區就開咗間福岡水炊專門店，無論食材定食法都跟足當地，而家喺香港都可以感受到正宗九州風味啦～

水炊雞鍋套餐(二人前)($550)

呢度嘅水炊鍋食法都好講究吓～福岡人覺得要跟足佢地嘅食法先可以感受到真正水炊鍋風味。首先先飲一啖充滿膠質嘅雞湯，雞湯濃郁而不油膩，不過因為湯底充滿骨膠原，比較杰身，所以火記得唔好開太大。

第二步就可以按個人口味加入調味料，飲完湯後就可以食雞啦～水炊鍋同日本一樣選用華味鳥，華味鳥飼養過程不含賀爾蒙、激素或添加劑，食落口感結實、雞味重而且無任何腥味。

以華味鳥製成嘅雞滑加咗雞軟骨，除咗有華味鳥嘅香味外，口感豐富。搭配埋橙醋、蔥花及柚子胡椒食好開胃～

最後一定要用個雞湯煮返個雜炊食，每一啖都係濃郁嘅雞味，真係一個完美嘅句號！

套餐包括埋前菜冰菜沙律，日本進口溫室冰菜配有機溫室甜番茄同土佐醋啫喱，味道偏酸，一樣咁開胃啊～

另外仲有華味鳥雞腿肉盛合、野菜盛合、唐揚炸雞及甜品等，最好就四個人一齊嚟食，咁就可以試埋其他菜式啦～

其他菜式就有串燒，如手羽先、雞肉丸、雞肉燒飯糰及梅醬紫蘇雞肉等，全部都好juicy，配埋啤酒啤一啤就最爽～

順．和の味   

地址: 中環德輔道中173號南豐大廈2樓3-5號舖

文、相、片: Yanica