飲茶唔去茶樓去 Cafe？皆因人氣西日式 Cafe SENSU 荃灣店同粵式點心專門店點心廊聯乘，推出期間限定嘅手工點心放題！75 分鐘可以任點任食 36 款點心、迷你丼飯，用 OpenRice 訂座同時訂餐更專享 75 折優惠！有邊款點心係必食？成個放題抵唔抵食？即睇電台主持歪歪到訪實測，試食唔同點心嘅心得啦。
 

歪歪實試

SENSU x 點心廊 36 款手工點心放題

惠顧 36 款手工點心放題嘅話，每位會獲贈黑松露灌湯餃一份。歪歪笑指本身佢鍾意食灌湯餃咬開爆汁嘅口感。不過呢個黑松露灌湯餃好巨型，就咁咬好易灼傷，店員都細心建議大家可以先咬開或者搣開個頂，用匙羹飲湯就安全啲。

黑松露灌湯餃（每位獲贈一份，數量有限）

歪歪一揭開灌湯餃嘅頂就忍唔住話：「豬肉同黑松露嘅分布非常均勻，第二就係見唔見到啲湯呀？多到咁喎！」平時食灌湯餃大家最怕一咬啲湯就飛晒出嚟，或者唔夠湯就食得唔過癮，但呢度嘅黑松露灌湯餃就完全無以上問題。歪歪更讃個餡有驚喜：「佢呢個豬肉係好軟綿綿，連埋個湯擺入口，係化開晒嘅！喺口腔有湯同豬肉嘅清甜，同時有黑松露嘅香氣。」提提大家黑松露灌湯餃數量有限，之後或有機會轉為其他點心或食物，想試記得把握時間。

黑松露灌湯餃嘅湯汁非常充沛，黑松露香氣濃郁

任食點心當中，有唔少都加入 SENSU 嘅元素，好似呢個龍蝦汁鮮蝦腸粉，就係衍生自 SENSU 嘅招牌菜：手打龍蝦湯。以龍蝦殼、河蝦頭等加上蔬菜熬煮，變成濃厚嘅龍蝦汁。配搭鮮蝦腸粉同樣出色。「好食呀！個醬汁就好似西式嘅龍蝦湯咁濃郁，櫻花蝦好脆口，加上腸粉裏面嘅蝦蒸到脹卜卜咁。無論味覺、定係口感上面都好有層次。」

龍蝦汁鮮蝦腸粉

為咗今次嘅點心放題，餐廳特別請嚟一位經驗豐富、嚟自廣東順德嘅點心師傅坐陣，因此唔少傳統點心，例如脆皮炸鮮奶都相當有水準。歪歪話驟眼睇以為上錯咗春卷，其實呢種圓筒形，以薄麵包捲起鮮奶嘅做法更外脆內軟。「佢炸得好香脆，裏面嘅鮮奶非常之綿滑，綿滑到有少少似布甸。同埋佢唔太甜，所以應該食兩條都唔會覺得膩。」

脆皮炸鮮奶

如果你好似歪歪咁係韭菜控，就唔好錯過香煎手工韭菜餃！歪歪提到佢細細個就已經鍾意食韭菜，但大個反而少食咗， 因為食完唔好食嘅韭菜，口腔會有陣味幾日都唔散。如果食到唔好食嘅韭菜真係會嬲，好在呢度嘅韭菜餃無令歪歪失望：「好脆呀個外皮！皮薄、包住嘅餡料好豐富好飽滿，真係好滿足。」

香煎手工韭菜餃

爆汁糯米雞一上枱打開後，歪歪就留意到呢個細節：「呢個真係蒸得好，彈吓彈吓同埋多汁嘅話呢，即係話佢蒸到荷葉、雞肉、鮑汁等所有香氣同精華都浸透晒喺每一粒糯米，食嘅時候呢就會香氣四溢。」糯米雞食落濕潤唔乾身，裡面熬製 12 小時嘅鮑魚汁更係畫龍點睛。

爆汁糯米雞

平時去飲茶或者都會見到芋頭糕，但 SENSU 嘅香煎芋絲餅做法同賣相完全唔同！比起坊間芋頭糕嘅芋頭粒唔多，呢度係用真·芋絲加少少粘米粉煎成，食得出一絲絲芋頭肉纖維。「芋頭嘅香氣係重過平時酒樓食嗰啲好多㗎！非常之香口，外皮都煎得好香脆，足料。」

香煎芋絲餅

點心之外，亦有四款 SENSU 特色迷你丼飯一樣係任食，好似呢碗迷你鰻魚黑咖喱丼飯，就係嚟自 SENSU 熱賣嘅鰻魚黑咖哩蛋包飯。喺日式野菜咖喱中加入竹炭粉染色，視覺效果一流。歪歪指食落就係日式咖喱偏甜嘅風味，不過黑咖喱的確有勾起佢嘅好奇心會想試，而且十分適合打卡。

迷你鰻魚黑咖喱丼飯

迷你叉燒丼飯當中嘅叉燒係用低溫慢煮方法處理，所以歪歪都都食得出叉燒嘅肉質特別鬆軟：「同平時出去食嘅叉燒飯有少少唔同，佢啲筋同肉都非常鬆化。」如果叉燒邊可以燶多少少就完美喇，不過歪歪都補充，以任食嘅水準嚟講算好食，收貨有突啦。

迷你叉燒丼飯

餐廳中央更設有自助區，有唔同款式嘅冷盤、甜品輪流供應，包括涼拌土豆絲、尖椒皮蛋、桂花糕等。

自助區

點心同迷你丼飯都好味又足料，要回本真心唔難，餐廳店員更透露最高紀錄係有食客食咗 35 份點心！你都想嚟試嘅話，記得要用 OpenRice 訂座同時訂餐，即享 75 折優惠，同時可以賺 Rice Dollars 回贈當錢使！

SENSU（荃新天地）

地址：荃灣楊屋道1號荃新天地UG樓UG78號舖

主持：歪歪

文：Cathy.H
相：Michael
片：Yan Yan