晚市重開，母親節除咗送花畀媽媽表心意外，仲可以帶佢哋去唔同特色餐廳食餐好㗎！今期應節啲介紹7間同花有關連嘅餐廳畀大家，有花膠主題餐廳、花系主題Cafe、花花造型甜品及花花火鍋等，各位偉大嘅媽媽們一定會食得好窩心～

花膠主題餐廳 膠園

花膠充滿骨膠原，係唔少女士嘅養身恩物，帶媽媽去食上環呢間花膠主題餐廳就啱喇。店內供應多款菜式，唔少以花膠入饌，融合中西特色又夠創意，而雖然以花膠為主題，但價錢都好貼地，主要選用來自冰島鱈魚膠，亦有菜式用較貴價嘅鰵魚花膠。推介花膠鮑魚系列菜式，如麻辣花膠鮑魚炒手打烏冬及花膠鮑魚海鮮配飯或意粉，前者加入自加製麻辣醬好惹味，後者啱晒鍾意食海鮮嘅朋友。

圖: <IVY>

法式玫瑰蘋果撻 Frenchies

每日新鮮手製，更巧妙咁將傳統法式蘋果撻演變成玫瑰花，一片片如花瓣般嘅蘋果片放喺法式甜撻皮上，絕對要相機食先。搭配新鮮香甜嘅蘋果蓉、雲呢拿及杏仁奶油，入口清香，甜而不膩。凡惠顧三個或以上更可獲得玫瑰花一朵，媽媽們一定sweet爆！

花雕海鮮 唐述

呢間中菜館推出養顏母親節晚餐，一共有十道菜，如以花雕酒入饌嘅15年古越龍山花雕蟶子皇及雞油花雕龍蝦燉椰皇，兩款都鮮甜有花雕酒香～玫瑰煙燻脆皮雞都有驚喜，皮脆肉嫩，煙燻味都幾濃烈帶少少花香點綴。

英式中菜館花膠扒 1908BC 

香港少見嘅英式中菜館，由於創辦人Suzanna嘅童年喺英國度過，受到媽媽親手烹調嘅英式中菜啟發。今個母親節分別供應經典及創新嘅母親節菜單，前者包括鮑汁冬菇扒花膠扒，富含蛋白質和膠原蛋白，軟腍入味。後者都有香酥鴨跟薄餅、脆皮餛飩配秘製紅醬及蜜汁排骨等菜式。

粉紅玫瑰甜品 Ami

去唔到旅行，帶媽媽去食法國菜都不失為一個好選擇。呢間法式小酒館選用各種法國直送嘅時令食材，如煙燻梭魚籽伴龍蝦頭盤、烤乳鴿配嫣紅色紅菜頭醬，以及用士多啤梨忌廉、大黃醬及蜜糖雪糕巧製而成嘅粉紅玫瑰甜品等都令人驚喜，視覺同味覺都令人滿足。

花花主題火鍋 香江花月 

以50年代舊香港風為主題，重現昔日華人洋行氛圍，餐廳足足用咗1200萬打造，真係可以堪稱為全港最豪華嘅火鍋店！一定要叫香江拼，其實即係牛肉拼盤，有和牛牛柳粒、安格斯牛、牛胸油、牛𦟌、牛心椗、牛柏葉及牛脷等。最特別係會以原木圓盤奉上，將各款牛肉捲成花朵般，好有心機。

打卡花藝Cafe 走過十萬八千里找到你

請嚟專業花藝師設計嘅cafe，天花板掛滿唔同種類、顏色嘅乾花，窗邊同樣用乾花裝飾，滿室花香，每一個角落都係打卡位。食物選擇亦好多元化，糅合日、台、意、法菜，如明太子．岩鹽燒蟹棒．三文魚籽．貓耳朵、龍蝦牛角包都幾有特色。

圖: 啊蛋

文: Yanica