母親節除咗同媽媽食飯之外，買個蛋糕返屋企切下影下相都好溫馨。無論你媽媽鍾意花花蛋糕、雪糕蛋糕定水果蛋糕都一樣無問題，即刻嚟巡個禮先！
草莓紅桑子慕絲蛋糕 東海堂
平時怕羞好少同媽媽講「我愛你」嘅話，不如就送個心型蛋糕畀佢表達你嘅愛意啦。呢個蛋糕其實係草莓紅桑子慕絲，面頭嘅朱古力珠珠同金箔仲增添咗幾分高貴嘅感覺添。而其他款式仲有藍莓絲絨忌廉蛋糕、芒果絲絨忌廉蛋糕同草莓忌廉蛋糕，總有一款啱你媽媽心水。
康乃馨蛋糕 Twinkle Baker Décor
母親節就算唔送花都可以送個康乃馨蛋糕畀媽媽吖，睇得又食得，媽媽應該會好滿意。蛋糕入面係由草莓果餡、雲呢拿吉士同雲呢拿海綿蛋糕夾層製成，味道甜得嚟唔會好漏。而另一款粉紅色心型鏡面蛋糕就以紅桑子雲呢拿味為主，配上手造玫瑰花，好有心思。
雙層什果薄脆蛋糕 聖安娜餅屋
如果多人食嘅話不如試下呢個雙層什果薄脆蛋糕啦。拎出嚟個樣已經霸氣十足，夠哂grand。除咗什果仲有草莓寒天同朱古力薄脆層等材料，層次豐富。而花蝴蝶草莓慕絲蛋糕面頭鋪上八朵手工制韓式牛油唧花同朱古力蝴蝶，靚到有啲唔捨得切開佢添。
紫丁香色朱古力雪糕蛋糕 Haagen Dazs
如果你媽媽係紫色控嘅話，呢個蛋糕應該會啱佢心水。紫丁香色朱古力包著嘅係士多啤梨雪糕，啖啖果肉，感覺好幸福。而外形好似盆栽咁嘅比利時朱古力雪糕蛋糕就寓意母親對子女嘅悉心栽培，相當有意思。
日向夏果醬豆乳蛋糕 A-1 Bakery
媽媽多數都會鍾意食健康啲嘅，呢個蛋糕以低糖豆乳忌廉同來自宮崎縣嘅日向夏果醬製成，「日向夏」其實係一款柑橘嚟嘅，味道酸酸甜甜，食落好清新。另一款芒果蛋糕就選用來自法國嘅忌廉，面層再鋪上花形朱古力，賣相優雅。
粉紅花花cupcake Sift Patisseri
怕蛋糕太大個食唔哂嘅話，其實cupcake都係一個唔錯嘅選擇。呢個花型cupcake造型的骰可愛，細細個唔會太heavy。而另一款「520」蛋糕就係由香草奶油餡餅、漿果同蛋白甜餅製成。送畀媽媽應該會覺得好窩心。
白朱古力康乃馨蛋糕 PAUL LAFAYET
呢間法式餅店就以白朱古力康乃馨為主題，餡料有以雲呢拿、白朱古力慕斯同果蓉，再配上海綿蛋糕同乾芒果脆餅底，口感鬆軟得嚟又帶點清新。由即日起至由5月31日，訂購呢款蛋糕仲可以免費獲贈「馬卡龍 X 朱古力」2件裝添，抵呀！
白朱古力慕絲熱情果蛋糕 Vive Cake Boutique
呢間餅店嘅蛋糕不嬲賣相都好精緻，而佢哋嘅母親節蛋糕就以白朱古力慕絲同熱情果果醬及慕絲層層交疊，感覺好有熱帶feel。而另一款蛋糕就以古力海綿蛋糕、士多啤梨慕絲、紅桑莓玫瑰啫喱同朱古力脆脆餅底等材料製成，味道同賣相一樣咁吸引。
同場加映：母女情深（Like Mother Like Daughter）下午茶套餐
Vive Cake Boutique仲同美妝品牌Benefit Cosmetics合作，推出afternoon tea set。創作靈感嚟自美國三藩市，希望帶畀食客創新活力嘅感覺。嘢食就有美式青檸忌廉牛油蛋糕、榛子棉花糖馬卡龍同迷你蟹肉蛋白撻等。凡惠顧兩位用下午茶套餐，仲會送立體提亮眉膏一支同即影即有寶麗萊相片添。快啲約埋媽媽嚟嘆下啦！
供應日期：5月1日至31日
供應時間：下午一時三十分至六時三十分（逢星期四至日及公眾假期）
文：Crystal
