After You Dessert Cafe嚟緊1月25日喺銅鑼灣原址正式開舖喇！甜品方面有大家期待已久嘅招牌刨冰外，更新增香港限定嘅鹹蛋黃蜜糖吐司；而刨冰、蜜糖吐司同熱甜品，每個系列各有4款口味。Cafe亦縮細咗自家產品區域，增加座位接待各位甜品控，但仍然買到熱賣嘅班戟粉、香口嘅鹹蛋黃脆粒等產品。

今年冷熱款式嘅甜品都多咗，一共有12款。

刨冰

泰國Training Manager Nancy會留港幾個月監察品質。

由泰國總店製作刨冰冰底。

店內所有食材都由泰國空運到港，好似刨冰所用嘅冰，都係由總店製作，保證原汁原味。每款刨冰都有唔同嘅內餡，而最具代表性嘅當然係芒果糯米飯刨冰，同埋泰式奶茶刨冰。佢哋製作好嚴謹，會用尺量度係咪達到14cm嘅標準高度。

芒果糯米飯刨冰（$148）

芒果糯米飯刨冰用泰國水仙芒製成嘅果汁冰製作，內藏軟糯嘅椰汁糯米飯同水仙芒果果肉，頂層再唧上忌廉奶醬同炒綠豆。成個組合好清甜，想濃味啲亦可以淋埋跟配嘅芒果汁。

泰式奶茶刨冰（$138）

泰式奶茶刨冰嘅冰，直接用返品牌嘅泰式奶茶製作，甜度會高啲。入面就有仙草啫喱粒同多士粒，增加香脆同彈牙嘅口感，而呢款忌廉奶醬上撒嘅係烤杏仁片，可以略為中和甜味。建議大家就咁原味試啖先，有需要先淋跟配嘅泰式奶茶糖漿。

蜜糖吐司

香港獨家款式｜鹹蛋黃蜜糖吐司（$128）

至於另一招牌蜜糖吐司，今年新增香港限定嘅鹹蛋黃味，雖然泰國曾經推出過，但今次係改良版，除咗喺吐司面搽上品牌自家蜜糖、鹹蛋黃醬，重再搽上自製嘅鹹蛋黃粉。將鹹蛋黃焗香後壓碎烘乾製成嘅鹹蛋黃粉，入口甘香唔太鹹，淋埋鹹蛋黃醬再蘸雲呢拿雪糕，鹹甜味道平衡得嚟都幾夾。

抹茶蜜糖吐司（$118）

抹茶蜜糖吐司都係上年冇嘅款式，同原味嘅分別係轉配抹茶雪糕同灑上抹茶粉，忌廉就一樣灑上烤杏仁片。

而原味同金莎朱古力味同上年一樣，想重溫可以撳文末嘅傳送門，但要留意價錢有所調整。

其他款式

無花果布甸蛋糕（$68）

4款熱甜品都配有雲呢拿雪糕，其中無花果布甸蛋糕係品牌創辦人最鍾意嘅款式之一。布甸以經典嘅sticky pudding為靈感，但改用無花果做主材料。蛋糕口感濕潤，入面重有無花果乾，伴以焦糖醬同撒上碧根果碎粒嘅忌廉，口感層次豐富。

士多啤梨金寶（$76）

呢個金寶改用新鮮士多啤梨煮成嘅果醬做底，比一般蘋果金寶甜，連埋面層焗到金黃鬆化嘅脆粒同雪糕一齊食，畀你享受冷熱交融嘅滋味。

左：Dirty（$42）｜右：薰衣草荔枝梳打（ $48）

飲品變化唔算大，但有熱嘅茶飲可以揀。如果鍾意清新啲嘅口味，可以試下薰衣草荔枝梳打，伴有兩粒荔枝果肉，顏色亦好啱打卡。另外香港店嘅咖啡系列，選用獨家引入澳洲咖啡品牌P&R嘅拼配咖啡豆，酸度適中易入口。

店內自家產品區域縮細咗，以增加座位接待大家。

去年以期間限定店短暫登場後，終於由另一個單位引入香港，而當時採訪拍攝嘅甜品同飲品，今年都繼續供應（聖誕款式除外），但價錢有所調整，重溫即按：https://s.openrice.com/Qrbc0zWo000 

After You Dessert Café
地址: 銅鑼灣登龍街52號景隆商業大廈地舖

文、相：Cathy.C