唔少人都鍾意去東南亞旅行，泰國曼谷就係其中一個熱門旅遊點，每日瘋狂Shopping、做massage、食好西是常識吧。開飯仔專誠搵咗泰國當地嘅同事為大家搜羅在地人最推介嘅美食！
曼谷嘅唐人街出名夜夜笙歌，啱晒各位夜貓們出覓搵食呀！今次開飯仔就帶大家夜蒲曼谷，食盡超地道泰國菜！

夠鑊氣炒麵 Pae Jai

 招牌菜﹕Rad Nha (40 baht)、Pad See Eiw (50 baht)

喺泰國想食得有鑊氣，咁就要試下呢間街頭泰國菜啦！佢位於唐人街嘅Nana alley，專做夜晚生意。特別推介佢哋嘅Rad Nha同Pad See Eiw，炒麵勁有地道「泰」味，火喉控制時間啱啱好，想再香啲嘅仲可以加多隻蛋添~

營業時間：5pm - 10pm，逢星期日休息

泰式車仔麵  Guay Tiew Lord Porn Chai

 招牌菜﹕Guay Tiew Lord (50 baht)

呢間超地道嘅路邊攤，由煮到食都喺路邊搞掂晒。老闆喺路邊架車仔煮好，就直接遞畀坐喺店前面嘅食客啦。記得要接穩呀！因為佢哋係冇檯提供呀。必試佢哋嘅「Guay Tiew Lord」，河粉配上魷魚、豬肉等唔同材料，再淋上黑豉油，夠晒惹味~

營業時間：6pm - 1am，逢星期一休息

泰式鐵板燒 Kruapornlamai

 招牌菜﹕Kua Krop (70 baht)、Rad Nha Talay Poo Khao Fai (70 baht)

必嗌佢哋嘅招牌菜「Rad Nha Talay Poo Khao Fai」，先上一碟放喺鐵板上嘅炒麵，再有一小碟海鮮汁。就好似鋸扒咁，一次過淋晒啲汁落去，聽到啲「滋滋」聲好鬼爽~不過想食就要預多少少時間去喇，因為日日都客似雲來，就算落雨都無阻大家想食佢嘅決心！

營業時間：4pm - 2am

夜貓海鮮店 T&K Seafood

 招牌菜﹕Pad Pak Bung

唔識泰文都唔使驚自己搵錯餐廳，見到個個店員都著晒綠色衫就冇錯啦。店前面有個開放廚房，任睇唔嬲呀！佢哋唔單止煮海鮮出名，炒菜都好有一手！最緊要就係佢哋嘅材料新鮮，唔怕食壞肚~

營業時間：6pm - 2am

煲仔燉豬肉 Mu Toon Num Dang Mor Din

 招牌菜﹕Moo Toon Mor Din (普通 60 baht) / (大份 100 baht)

呢間舖頭真係超有性格，由夜晚10點開到2點，只開4個鐘頭。佢地menu仲有性格！就只有一道菜——「Moo Toon Mor Din」，怕食唔晒可以揀正常份量，但難得嚟到就梗係嗌大份慢慢食啦~

營業時間：10pm - 2am，逢星期一休息