泰式海南雞一向受歡迎，唔少泰菜館、海南雞專門店都有供應。繼灣仔有間水門雞飯外賣店後，最近上環又有間新開嘅海南雞公主，專做海南雞外賣，由泰籍混血藝人開設，廚師都係泰國人，做得夠專！

舖頭細細以外賣為主，亦有少量座位可以堂食。老闆娘Maya媽媽為泰國人，對泰國菜特別熟悉，曾於西貢開設泰國餐廳，今次上環店就專攻海南雞。Maya稱：「開店因為以前泰北師傅調製咗一個好好味嘅海南雞醬，為了呢個特製麵豉醬而開店！醬以辣椒、香茅等多種香料加埋麵豉醬打成，每兩日做一次，花相當多功夫。」

選雞方面亦講究，Maya話試過多款唔同雞，連新鮮雞都有考慮過，但新鮮雞肉質太結實效果唔理想，最後選用風冷雞。雞要先醃製4小時再浸45分鐘而成，每日大約供應二十多隻左右。

公主海南雞飯 $62

雞味特別濃，連雞皮都有雞味，雞肉嫩滑亦有彈性。雞肉皮下脂肪唔多，而且有一層滑溜透明膏，食落軟滑。

雞飯跟三款醬汁，麵豉醬酸辣惹味，食到濃郁薑同香茅味，味道富層次感，食到好上癮！而另一款海南雞醬就偏甜，有少少似泰式辣醬但甜版，完全唔食辣就可以點薑蓉。

雞油飯帶黃色，用泰國香米煮成，粒粒分明唔算油膩，但雞油味道淡咗啲。另仲可配五穀飯，非常健康。

海南雞飯以便當形式，有前菜、主菜、小食或者飯後甜品，前菜有青瓜沙律、柚子沙律及青芒沙律等，小食有泰式雞粒，甜品就有椰子大菜糕、千層糕等，每星期都會轉款保持新鮮感。

全店只供應五款飯，海南雞飯以外，泰式豬手飯及紅咖喱牛腩飯都長期供應，另外兩款就會轉換。豬手飯選用加拿大豬手，用泰式香料炆製3小時，豬肉腍滑入味。醬汁都係特別製作，味道比雞醬酸，可以中和膩滯。

泰式豬手飯 $62

紅咖喱牛坑腩又係要慢煮4小時，用20幾款香料自家製，咖喱汁香滑富椰香，冇乜辣味，任何人都食到，牛腩亦唔會太韌太老。

紅咖喱牛坑腩飯 $68

店內亦供應自家製飲品，好似洛神花泰式特飲、蝶豆花飲品及龍眼冰等。

加$15就有洛神花、蝶豆花及龍眼冰等泰式特飲

海南雞公主

地址：上環摩利臣街10號宏基商業大廈地下8A號舖

文、相、片：Perrins