2022年嚟到第14屆港澳米芝蓮，因應疫情今年依然以線上發佈會方式進行，香港共有71間餐廳獲頒米芝蓮星級肯定，11間為新上榜或由米芝蓮推薦餐廳晉升，而去年新增嘅「綠星」餐廳今年亦有新餐廳上榜，即刻同大家逐間介紹下先！
| 香港 | 澳門 | |
|---|---|---|
| 三星 | 7間 | 3間 |
| 二星 | 12間（2間晉升） | 5間 |
| 一星 | 52間（5間新入選、4間晉升） | 7間 |
| 必比登推介 | 64間（5間新入選、4間晉升） | 7間 |
| 街頭小食 | 15間（2間新入選） | 8間 |
| 綠星 | 2間（1間新入選） | 1間 |
新晉升二星餐廳
星級名廚開設 Octavium Italian Restaurant
圖: 餐廳網站
由名廚Umberto Bombana開設嘅餐廳，店名Octavium係拉丁語「8 」嘅意思，主打各款經典意大利料理。能夠晉升為二星，係米芝蓮評審肯定駐店主廚Roland Schuller從採購食材、精心製作及設計餐牌嘅努力，特別係餐廳嘅招牌菜：自製手工意粉。
精緻粵菜新高度 欣圖軒
圖: 餐廳網站
位於尖沙咀嘅欣圖軒重奪米芝蓮二星！呢間粵菜館係正值酒店重建唯一保持營業嘅餐廳，保留其優雅嘅玉石主題裝修之外，亦坐擁壯麗維港景致。行政總廚劉耀輝師傅有超過30年粵菜經驗，其紮實功架得到肯定之餘，更獲米芝蓮評論為「展現出精緻粵菜嘅高度」。
新入選/晉升一星餐廳
嶄新歐陸x新加坡菜 Whey
由新加坡主廚Barry Quek活用北歐料理手法及醃漬發酵技術，炮製具備新加坡風味、別樹一幟嘅美饌，例如主菜「肉骨茶」豬肋排，顧名思義係以胡椒肉骨茶（Buk Ket Teh）作為靈感。同時餐廳希望為可持續發展出一分力，因此大量選用本地優質食材並物盡其用，減少廚餘。
Barry得知奪星後表示倍感榮幸：「衷心感謝所有朋友同客人對我哋不斷嘅支持同信賴，令我哋能夠喺短時間內獲得米芝蓮指南認同。我哋會繼續努力不懈發掘更多新加坡嘅獨特味道，創作別具一格嘅特色歐陸菜，為客人締造源源不絕驚喜。」
重新演繹印度小食CHAAT
行政總廚Manav Tuli將印度傳統嘅街頭小食文化帶到香港，重現印度各個地區嘅特色小食同手工菜，特別係招牌小點例如Raj Kachori、Baked Samosa等等。加上餐廳特特別配備配備三部印度正宗Tandoor烤爐，多款烤肉菜式亦值得一試。
Manav Tuli表示：「我哋非常感謝《2022年香港及澳門米芝蓮指南》嘅認可。 希望米芝蓮之星能為印度——我嘅故鄉、出生地同靈感嘅美食帶嚟嶄新視角，豐富印度菜嘅想像。亦感謝團隊每日孜孜不倦為客人創造美妙嘅餐飲體驗。」
韓國料理新面貌 Hansik Goo
由首爾米芝蓮二星食府Mingles嘅主廚姜珉求大廚帶領，去年8月重新開業嘅Hansik Goo終於從推薦餐廳晉升為一星！以傳統韓式料理為基礎，以現代風格展現出全新面貌，希望可以令更多客人體驗韓食之美。
姜大廚對於得到一星深感榮幸：「韓國菜系能夠獲得香港米芝蓮指南嘅星級肯定係一項莫大榮耀，Hansik Goo團隊矢志宣揚韓食文化，並喺呢個充滿活力嘅國際美食都會，繼續向食客呈獻各款現代風格嘅韓式美饌。」
拉丁美洲文化x現代法國菜 MONO
圖: 餐廳網站
米芝蓮三星級餐廳 Mirazur前主廚Ricardo Chaneton創辦嘅MONO首次獲得米芝蓮一星，米芝蓮評審大讚其品嚐菜單以大膽鮮明嘅風味呈現拉丁美洲食材，唔單止係因為大廚對其委內瑞拉出生背景致敬，同時亦歸功於擁有全面嘅傳統法國菜訓練。
Ricardo表示：「獲《米芝蓮指南》授予一星係一項了不起嘅榮譽，我希望將呢個獎項獻畀我嘅家人、員工、供應商、生產商同食客。我好榮幸成為首位獲得此殊榮嘅委內瑞拉籍廚師，希望藉此令大眾進一步關注其他南美廚師同我哋嘅烹飪傳統。」
正宗經典粵菜 家全七福
圖: byfoodie
由人稱「七哥」、前福臨門主理人徐維均先生開設，餐廳致力炮製傳統正宗嘅高級粵菜，有唔少都係失傳已久，或者需要繁複工序嘅手工菜式，例如金錢雞、懷舊燒賣等等。2019年起已登上亞洲50最佳餐廳名單當中，今年則從米芝蓮餐盤推介晉升為一星。
精緻寧波菜 甬府
圖：餐廳FB
甬府以製作集鹹、鮮、香嘅寧波菜為宗旨，而同一品牌喺上海都連續5年榮獲《上海米芝蓮指南》一星名銜，本身有一定水準。2019年進駐香港後，繼2020年獲得米芝蓮推薦，今年更上一層樓，新登上香港米芝蓮一星。寧波盛產海鮮，所以有唔少相關菜式，而呢度嘅招牌十八斬、紅燒雷達網帶魚、花膠醃篤鮮等菜式都選用新鮮足料嘅食材，經過師傅巧手製作更加別具風味。
米芝蓮名廚坐鎮法式餐廳 BELON
圖：主打新派巴黎菜嘅BELON，搬舖前已經攞過一星，喺中環原區重開後亦再次獲得一星殊榮。主廚Kirkley以前亦曾帶領位於芝加哥嘅L2o，以及三藩市嘅COI餐廳分別獲得米芝蓮二星同三星名銜，出品有一定保證。今次Kirkley憑住佢嘅法式烹飪技巧，配合亞洲區內優質嘅時令食材，出品都相當出色。其中重新打造嘅餐廳招牌菜酥皮乳鴿，完美呈現BELON「故意減少花巧擺盤」嘅宗旨，反而更著重對味道嘅追求。
星級日式鐵板燒 I M Teppanyaki & Wine
圖：餐廳由大坑搬去天后嘅2,000呎大舖後，今年再度登上一星。喺擁有逾40年功力嘅莫燦霖師傅帶領下，團隊巧妙地將世界各地嘅新鮮食材，製成高質嘅日式鐵板燒。餐廳提供唔同價位嘅套餐、單點款式同廚師發辦，豐儉由人。而家餐廳闊落咗，亦更支持建立共融社會，例如容許導盲犬進入，盡力配合唔同客人嘅需要。
高質江戶前壽司 Sushi Wadatsum
圖：餐廳喺搬舖前已獲得多年米芝蓮一星，上年移師尖沙咀後，今年立刻再上榜，可見環境同食物水準保持一貫質素。餐廳選用每日由東京豐洲市場直運到港嘅時令食材，製作江戶前風味嘅壽司廚師發辦，配搭經過嚴選嘅日本清酒同葡萄酒，等你留港都享受到日本高水平嘅壽司品質。
新入選綠星餐廳
5星級酒店法國菜 Amber
圖：作為5星級酒店餐廳，同時保持米芝蓮二星嘅法式餐廳，Amber相信「烹飪上嘅卓越成就，離不開對致力打造可持續性世界嘅承諾」，今年更新上榜成為綠星餐廳。為咗將可持續性嘅原則融入日常運營之中，減低碳足跡，餐廳作出多方面努力，好似引進瑞典Nordaq FRESH淨水同裝瓶系統，為食客供應純淨水同氣泡水，並徹底棄用進口飲用水，以免浪費水樽。另外亦從食材入手，採用符合道德標準嘅動物蛋白、不含抗生素和生長激素嘅食材；而淘汰乳製品，供應素食菜式亦幫助減少溫室氣體排放。餐廳亦採用公平貿易認證嘅朱古力、雲呢拿、咖啡同茶；對內更確保團隊得到公平嘅待遇，例如兩性同工同酬等。重有好多措施未能盡錄，難怪Amber喺維持可持續性的價值觀上得到認可。
新入選街頭小食
懷舊手工中式糕點 方太糕品舖
圖：製作中式糕點講求技巧同耐性，而呢間本土小店就供應價格相宜嘅芝麻卷、白糖糕等逾10款傳統手工糕點。小店之所以深受歡迎重有一個因素，就係堅持製作健康少甜、無油嘅素食糕點，等大家品嚐傳統食品時，唔會攝取過多糖分。
堂食招牌爉味糯米飯 強記美食
圖：強記美食搬舖前以街邊小店形式經營，當時已經唔只一次攞到街頭小食推介。上年搬舖後增設堂食，雖然舊有菜式價格向上調整，但環境舒服咗而食物不減風味，今年亦再度上榜。新店亦喺原有食品嘅基礎上增設款式，例如砂鍋鮮牛粥、砂鍋燒鴨粥、鴛鴦腸雜錦爉味糯米飯，畀食客有更多選擇。
文：Cathy.H、Cathy.C