門口日日都排長龍嘅灣仔麵包店，最近進駐中環蘇豪區，除咗供應原有嘅烘焙美食外，仲有成10款新包推出，暫時仲係新店限定添咋！相信嚟緊中環都會出現人龍喇！

麵包控一定會聽過Bakehouse嘅大名，創始人Grégoire Michaud有超過30年嘅烘焙經驗，仲曾經喺四季酒店擔任過糕點行政總廚。佢對麵包製作相當有堅持，新店全部嘅麵包都係喺現場新鮮製作同烤焗，同灣仔店一樣，選用上等食材如法國有機麵粉、澳洲牛油等。

 新推出嘅麵包，暫時只係中環店有售

多款人氣產品好似招牌酸種葡撻、牛角包同酸種麵包等，當然繼續有售啦，另外仲特地創作咗10款新口味麵包，當中包括3款甜包、2款鹹包、3款三文治同2款意式薄餅。

首推一定係港式牛腩包，先以鹽醃咗牛腩幾日，再加入草果、肉桂、甘草一齊炆燉牛腩。每個包都保證有成150gram嘅牛腩，相當足料，牛腩入味軟腍。

另外兩款三文治包括火腿芝士三文治同Mozzarella芝士香蒜蕃茄三文治，足料豐富。Greg解釋今次特意設計咗多幾款三文治同鹹包，就係希望方便呢區嘅打工仔，無論朝早定lunch過嚟都可以grab and go~

鹹包則有巴東牛肉批同腸仔卷，前者咬開滿滿牛肉餡，仲夾有洋蔥添，味道層次豐富；後者外層酥脆，中間夾住條腸仔都幾juicy。

至於甜包方面，榛子朱古力酥啖啖香甜酥脆；法式甜點Tropezienne夾住軟滑嘅自家製雲呢嗱忌廉；而忌廉冬甩則新增抹茶口味，香滑甘甜仲微微爆漿。

 烤蕃茄/烤薯仔意式薄餅(Focaccia)

 新店麵包種類多元化，主力做外賣，不設堂食座位

Greg仲表示希望遲下有機會就可以進駐埋九龍，各位粉絲要齊齊集氣啦！

Bakehouse
地址：中環士丹頓街5號嘉彩閣地舖

文、相、片：Kar