星期一唔一定係blue Monday嘅，可以係burger Monday都得！灣仔有間歐洲風小店，話佢係hidden gem都冇錯，位於船街盡頭嘅小巷中，係就係偏咗少少，但食物質素有驚喜。

餐廳樓高兩層，每星期有幾日都係主題夜，例如逢星期日係Sunday roast，多款烤肉選擇，而逢星期一係burger night，三款分別係牛肉、炸雞同impossible (素食)漢堡任揀，搭埋薯條都係 $98。至於今次想同大家介紹嘅，就係肉食獸最愛嘅steak night喇，日期係每個星期二晚啊！

每到星期二嘅夜晚，呢度嘅牛扒就會變得特別抵食！自選一款牛扒+一款醬汁+一款薯條，二百蚊。鍾意多啲油脂香啲嘅肉食獸，可以揀10oz嘅肉眼扒，肉味仲好香濃啊。

8oz嘅牛柳肉色粉嫩，肉質相當軟腍。

西冷扒則係12oz，三款當中肉味最濃就係佢，師傅控制火候得宜，塊西冷燒出嚟個香仲係脆脆哋口，同時又保留到肉汁，好juicy。

三款薯條選擇分別有原味、蕃薯條同黑松露薯條。脆口就唔使講啦，蕃薯條帶有甜香，黑松露則如一貫嘅香口。

有肉有薯條，但好似硬係爭緊啲嘢咁？冇錯，有埋杯啤酒perfect池喇。親，加錢嘅話，就唔止得一杯喇，係無限杯啊！兩個鐘內可以無限任飲啤酒同汽水啊。

餐廳另外亦有多款特色招牌菜，首推嘅係威靈頓牛扒，外酥內軟，就連邊邊啲蘑菇蓉都好香。

另一道特色菜係慢煮鴨脾窩夫。窩夫比坊間食開嘅更脆口，而經慢煮處理嘅鴨脾嘅肉質則好軟腍，一脆一軟，再狠心啲拮穿個蛋黃佢，沾埋湧流出嚟嘅蛋黃汁食，口感更加豐富。仲有啊，粒粒煙鴨胸肉嘅煙燻味極濃郁，成道菜好惹味。BTW餐廳雖然樓高兩層，但都唔算太多位，建議大家去之前最好先訂座，如果經OpenRice網上訂座嘅話，仲可以同時儲埋里數添~

Three Blind Mice  
地址：灣仔船街35號地舖

文、相、片：Kar