踏入冬天，最想就係食返啲熱辣辣嘅港式小炒喇～灣仔最近新開一間港式小炒餐廳，主力供應多款有昔日大排檔風味嘅鑊氣小炒，菜式選擇超過七十款，而且所有菜式都係即叫即炒，夠晒鑊氣！所以想食好嘢就要花啲時間等喇。

金牌煲仔飯

煲仔飯簡直就係冬天恩物！將臘腸、膶腸等臘味剁碎後連埋飯一齊煲，飯同臘味嘅比例係二比一，味道恰到好處，有濃濃臘味香又唔會過鹹。另外加入秘製豬油，飯焦唔會痴喺煲底，撈勻後反而每一啖都食到香脆嘅飯粒。另外食材會根據時令而有變～

避風塘炒肉蟹(時價/約$480-520)

選用用斤四嘅新鮮肉蟹，肉質特別鮮甜厚實，配上即炸蒜蓉，好惹味啊。而且真係好抵食，喺出面呢個size賣緊六百至八百蚊㗎。

拔絲咕嚕肉($98)

選用豬梅頭肉，即叫即炸然後炒再拔絲，口感香脆肉質軟而彈牙，而且醬汁味道恰到好處，唔會過甜及過酸。

招牌水煮桂花魚($188)

選用新鮮游水桂花魚，魚肉嫩滑，加埋師傅秘製辣汁，同坊間唔同嘅係，辣汁辣味唔會太重，主要想突出返魚嘅鮮味。

鐵鍋黑椒豬手($168)

用鐵鍋呈上傳統嘅黑椒豬手，上枱嗰陣仲熱辣辣出晒煙，選用大豬手髀上位，厚肉滑身，而且外皮都唔肥膩，配埋香濃嘅洋蔥黑椒汁，真係好有風味～

豉椒炒生腸($98)

惹味傳統小菜，新鮮生腸先用薑蔥飛水，有齊腸頭 及腸花，口感爽脆，佐酒真係一流！

大排檔小炒
地址: 灣仔天樂里2-4號金豐商業大廈地舖

文、相、片:  Yanica