前排睇到台灣網友瘋傳醜比頭造型牛奶鍋，而家香港終於都有啦！旺角呢間新開火鍋店炮製10幾款不同造型嘅火鍋湯底，滾起之前再睇住佢「溶」入湯中，影相一流之餘仲好有治癒感！

介紹番主角造型湯底先！舖頭先用超過40公斤嘅豬筒骨、豬骨、豬皮等去熬煮兩日，然後再倒入模中雪硬。製作咁大隻嘅熊仔，起碼要至少16-17個鐘頭先做起一隻，好花時間架！

舖頭準備咗小熊、猴子、招財貓、貴婦狗等10幾款造型，上枱後倒入少許清湯，可以睇住隻公仔滾到溶化，可以慢慢影相！

呢幾日仲特別新增咗mini版造型湯底添，更cute！

火鍋湯底則有8款選擇：皮蛋芫荽湯、沙爹湯、豬骨湯、番茄濃湯、冬瓜排骨湯、人蔘雞湯、豆乳海鮮湯及重慶麻辣湯。選擇困難症患者更可加錢選擇四格湯底，一鍋品嚐晒4款口味。

人蔘雞湯（左）入面有幾件雞肉、人蔘、紅棗等配料，滾嘅時間越長，人蔘嘅甘味更突出，用嚟配白肉或者海鮮都幾夾；近期港人熱愛嘅重慶麻辣鍋（右）亦幾足料，有辣椒、胡椒、芫荽、豆卜、芽菜等等，初時辣味一般，越食越有辣勁，用嚟涮牛肉，味道一流！

火鍋配料方面，一定要食回本海鮮，包括：象拔蚌、蜆、海蝦、蟶子、生蠔、帆立貝、青口、墨魚滑、鯪魚滑等，建議一開始就食海鮮。易熟之餘，亦令湯底越滾越鮮甜。

要數最鮮甜嘅海鮮，一定要蜆。蜆肉雖然細細粒，但鮮甜無比，而且無乜沙，食落好正，絕對係不斷encore嘅食物！

蟶子雖然不算好鮮甜，但勝在蟶子肉夠爽口。

墨魚滑每日新鮮即打，口感非常彈牙，配埋微甘嘅人蔘雞湯，味道出奇地夾喎！

身為牛魔又點呢？火鍋包美國肥牛及牛腩。想食靚牛嘅話，可加錢品嚐特選美國牛肉、美國牛小排。牛味濃，亦好有嚼頭。

另有自助火鍋配料區，擺放丸類、蔬菜、麵類等各式配料畀客人自取，推介（左）煙肉、（右）牛柏葉。

而另一邊嘅自助醬料區有火鍋豉油、蒜蓉、炸蒜、麻油、胡麻醬、沙茶醬、蔥、辣油、辣椒、芫荽、七味粉等等。

除咗海鮮火鍋之外，仲有日式放題，可任食刺身壽司燒物天婦羅日式小食等等等等。

天婦羅新鮮即炸，外脆內軟，而且落嘅粉漿都幾薄，不太感油膩。

等火鍋滾起時，食客們亦可柯打各款炸物，香口而好味，有蒜香雞中翼、燒汁帶子貝、汁燒翠玉瓜、燒粟米等等。

抵食位係，海鮮火鍋包埋任飲，飲品都有十幾款選擇。

舖頭好啱一大班朋友聚會，而且以金屬、仿皮椅等歐陸裝飾，比起其他火鍋店新潮，座位亦覺闊落。

價錢表：

注：星期五至日、公眾假期及其前夕加收$10；另設加一

八鍋堂
地址：旺角西洋菜街1號兆萬中心3樓301號舖

文：Joy