天氣一凍，又係攞正牌去打邊爐嘅日子！去打邊爐無肥牛就等於無靈魂？啱......一半啦！食埋食埋唔少碟牛肉嘅你，到底又知唔知自己食緊牛肉嘅咩部位？咩牛肉先啱打邊爐？如果自問係愛牛成魔嘅牛魔王，不如就由呢個冬天開始試多啲唔同嘅牛肉，邁向真正成精之路......開飯仔I mean牛精個精呀。
招牌牛精鍋x牛白肉 牛精皇
由店名就開宗明義話畀大家聽，啱哂牛精同想成為牛精嘅各位食客去。第一次去嘅話可以先嗌一個招牌牛精鍋，入面已經有金錢肚、牛孖筋、牛尾、牛腩同牛膀等唔同部位，唔單止可以試到唔同牛肉滋味，而且仲可以令到湯底更香。
人夠多嘅話可以嗌牛皇拼盤，人比較少嘅話重點推介比較少見嘅牛白肉，即係是接近牛胸骨嘅軟骨位，淥一陣見到佢開始捲起嚟就食得，食落特別爽脆又不失油脂香。
刁鑽部位任你點 616牛肉火鍋專門店
想再食牛嘅唔同部位？咁呢間今年新加入嘅牛肉火鍋專門店就啱哂喇，店主自己親自去揀山東騸牯，即係一歲嘅時候被閹割嘅牛，荷爾蒙改變後脂肪比例增加，所以騸牯牛肉油花同脂肪更多。
餐廳清一色以唔同部位牛肉做主打，推介嘅匙肉係牛肩胛側位，脂肪雪花平均入口嫩滑。封門柳係橫隔膜嘅肉柳，一隻牛得兩條，牛肉香味最濃郁肉汁最香甜。不過湯底得一款牛湯，而且其他配料選擇唔多，如果唔係一心想嚟一試唔同牛肉真味嘅話，可能就要失望啦。
牛肉賣手自己開店 牛皇阿莫
講到牛肉，除咗廚師，有邊個會夠牛肉賣手熟吖？呢間新開嘅火鍋店其中一位老闆就係有35年牛肉批發零售資歷，喺行內有牛肉大王之稱嘅莫景雄。
直接入貨嘅山東騸牯牛可想而知有幾優質新鮮，所以唔單止有各款刁鑽部位，連牛肉刺身都有供應。牛肉推介方面，牛頸脊同牛𦟌等當然係必試，特別介紹埋坑腩爪，賣相唔算靚而且要烚半個鐘，但呢個肋骨之間嘅肉入口煙韌得嚟又有濃郁牛香。
連牛內臟都有得食 牛皇星
首先要一讃呢間餐廳會送一個冬瓜盅做湯底，無偷工減料之餘清甜湯底可以就咁飲嚟開一開胃。呢間火鍋店嘅老闆本身都係牛精一名，所以呢度唔單止有各款部位牛肉，連少見嘅內臟都有！
例如牛姜，係牛隻心口軟骨前面嘅筋位，烚到透明撈起就食到煙韌口感。又或者牛心椗，其實即牛嘅大動脈，雖然欠缺油脂香，但就脆口到唔似食緊牛肉。當然招牌手切牛肉、牛頸肉同牛肉粒等都相當有水準。
開飯編輯推介：
1. 【專訪】「我喜歡堅持 我只得堅持」 新入圍米芝蓮法式泡芙店谷底反彈
3. 10月份好評餐廳十強
熱門文章推介：
3. 精選芋圓甜品舖PK戰
隨時接收最新資訊
讚好OpenRice專頁！
