04年開始撰寫網上食評， 在不同飲食界網站發表近二千篇文章，亦曾為飲食雜誌介紹本地食肆及撰寫深圳飲食小冊子，足跡遍及深港澳。fb專頁：爐心私語
以往拉隊上深圳，中間‘攝’時間，多數會光顧一間雄踞深圳多年的老店，但那間店多年來都只係食老本，毫無裝潢都算，清潔程度是每況愈下，洗手間蚊蟲亂飛，空氣中傳來異味，店內空調機即使調至18度，在夏天依然令人汗流浹背，所以近年已經放棄。
然而新一代牛肉火鍋店，如雨後春筍，大街小巷，總會有一間係左近。
今次一天之內，走訪了三間深圳最具人氣的牛肉店外，另加一間早前光顧過的「東施效顰」店，可說是各有千秋，但都有一個共通點，牛肉都是掛在門口顯眼處，即點即切，包保新鮮。
貪方便，中午時段先造訪潮汕大目位於春風路店，共分兩層，如在廂房用膳，每位客人配獨立小鍋，乾淨衛生，加上以平板電腦點菜，感覺良好。
無湯又點打邊爐？牛雜湯底，香濃牛味，份量十足，草肚、金錢肚、竹腸及蘿蔔，全部都煮得夠稔，老實講，加個生麵已經足以頂肚。在醬料吧以麻醬及辣油調了醬汁，因為湯底夠濃，根本無須再蘸點豉油。配料首選最愛的牛胸油，色澤泛黃，新鮮度有驚喜，比起那老店之流，高出不止一班。
牛肉每天新鮮運到，而且部位分得仔細，各有不同嚼勁及肉味，即切即上，舖滿一整碟，就算是人仔138一碟，也覺值得，同樣份量，換了係香港，至少貴一倍，如果即時登記做會員，仲有折扣，四碟不同部位牛肉，埋單不過人仔$420，算來人均不到港幣$250，夠划算。
而福合埕在網上品評中位列三甲，講門面的確是最佳，但食物卻是三間中最乏善可陳。今次選來車公廟站店，附近康樂設施齊備，就算唔想食火鍋，依然有其他選擇。
為免重覆味道，簡單地來個港人常點的鴛鴦湯底，辣度係勁，但只是死辣，可惜。其實個人幾喜歡店內座椅闊落，環境舒適，又沒有討厭的異味。
但食物反而出事，牛胸油最差，肉質雪白，咬落味如嚼蠟。唯一有鮮打牛丸，彈性強，肉味較濃，但牛肉不如其他兩間新鮮。
八合里是深圳風評最強的火鍋店，分舖極多，因為附近仲有好幾間同類食肆，搵位夠方便，但想不到未夠七點已經有幾十人等位，場面壯觀。若果錯過了第一輪入坐，兩個人基本上都要等半小時。店內坐位比較狹窄，而且部份座位正正係廁所門口，傳來陣陣異味，個人完全接受不了，但內地人卻不以為然，照食可也。
調味醬料每間都大同小異，分別不大，都是芝麻醬、香油、蒜蓉、蔥花及醬油之類。
湯底選了牛腩湯底，喝起來的確有淡淡的牛香，舀一下，牛腩的份量大概有十幾塊，單就湯底而言，是不過不失。
有趣的是，近年在火鍋店，發覺多了客人選用清水湯底，未知是否對湯底的信心不足，抑或更能吃出食物的原味？
從大門口牛肉專櫃睇，單是切肉店員，已經有三四個，刀法乾淨俐落，所以上菜速度超快，基本上五分鐘內必到，可以快食快走，是雙贏的局面。
但牛丸是預先煮熟，牛丸味在三間中最淡，死膠一般的彈性，實在令人提不起勁。至於牛胸油，同樣色澤泛黃，是看得出的新鮮，只須放入湯內灼十幾秒，咬落爽脆帶油香，跟潮汕大目是難分高下。
牛肉無論是嫩牛肉抑或五趾肉，都是吃得出的新鮮，而且價錢親民，撇開裝潢不說，兩至三人啱啱好，可以話學生哥都可以享受。
其實先後造訪過四五間同類店，都有不俗的表現，係香港一碟靚少少既手切牛，閒閒地收三幾百，反正近日開始轉凍，如果行經深圳，找間好一點的牛肉火鍋店，真的不會令你失望。
※上述內容純屬作者個人意見，不代表本網立場。※
隨時接收最新資訊
讚好OpenRice專頁！