agnès b.除咗擁有強大嘅時裝王國，近年跨過界連花店、cafe都玩埋，今次再有新嘢，開設首間以朱古力為主題嘅cafe，一班鍾意朱古力嘅fans又多一個潮聖嘅地方啦！

呢度供應嘅甜品，朱古力濃度好多都係64%，可可味香濃之餘又唔會太苦澀，啱啱好。成間舖都有頗多款唔同嘅甜品包括雪糕、蛋糕、窩夫、心太軟等，甚至連最近最hit嘅疏乎厘熱鬆餅都有！即刻同大家睇下淨係得呢間分店先有嘅限定產品。

先講最受歡迎又可以邊行邊食嘅雪糕。64% Delices朱古力雪糕，好軟滑，好香濃嘅朱古力味。另外有款全黑嘅雪糕，唔好見黑色就以為係芝麻味喎少年，甜筒係竹炭，而雪糕，估佢唔到，係玫瑰花茶味！玫瑰味唔算好突出但都會食得到花香，但千其唔好見呢款雪糕咁型就係咁影相呀，溫韾提示，都溶得幾快下LOL

心太軟有血橙味，都流心呀，而且係以中和些少朱古力嘅甜膩，帶點小清新。

飽肚啲嘅選擇就有梳乎厘熱鬆餅配朱古力醬同朱古力藍莓熱鬆餅。兩者嘅口感都幾唔同，前者冇想像中咁有空氣感，而係有啲啲煙韌嘅嚼感，仲好飽肚，反而後者則更鬆軟，而且鬆餅本身都有朱古力味，甜甜地幾開心。

雖然成餐都係朱古力，都幾膩，但係面對住呢杯64% Delices特選朱古力，真係好大誘惑，朱古力味極香濃，又因64%嘅關係，苦苦地，但鍾意dark choc嘅朋友實鍾意，飲落比較杰身，淨飲都會有飽嘅感覺，而想再滑身啲嘅可以加少少cream落去。

仲有個朱古力火鍋，應該都會令朱古力控著晒迷。兩人份量嘅，同樣都係64%朱古力漿，配料除咗有食開嘅棉花糖、士多啤梨之外，仲有啲新鮮感配搭，包括無花果、奇異果、青蘋果之類，不過呢啲好似都係就咁食開心啲。

門口仲有兩大個雪櫃，放咗好多朱古力同蛋糕甜品，外賣又得、揀入去坐低食都得。

新店有開張優惠添呀：凡於2017年9月16-17日、23-24日兩個週末去到旺角朗豪坊4樓中庭，agnès b. 嘅b. bear熊仔將會大派Mystery Black朱古力雪糕買一送一優惠券架，同朋友一人一杯啦！

agnès b. CAFÉ
地址: 旺角亞皆老街8號朗豪坊3樓33號舖

文：Kar、Joyce
相：Kar