上環呢間新開嘅Cafe裝修走色彩繽紛又精緻嘅摩洛哥風格，食物有水準之餘又做到同坊間嘅唔同，例如All Day Breakfast用自家製慢煮豬肉代替煙肉，惹味得嚟唔會太油膩。精品咖啡就選用本地烘焙嘅咖啡豆，Combo當中嘅Cold Brew最特別！
NACASA Café & Bar位於上環華里，老闆之一去過摩洛哥同土耳其，因為好鍾意呢兩個國家嘅風格，就將當地特色帶到香港，好似彩色瓷磚、編織地氈、復古吊燈、編織掛飾、彩色玻璃燭台等等，等大家唔使飛都有置身摩洛哥嘅感覺！唔單止環境加分，食物亦有加入異國元素。
NACASA’s Combo（$78起）
比起坊間嘅Combo通常只有Espresso同Piccolo，呢度仲會有自家Cold Brew一共三杯，而且附上鮮果畀大家清洗味蕾。建議試嘅時候先飲Espresso、Piccolo，最後飲Cold Brew呢個順序。Espresso同Piccolo都選用House Blend咖啡豆，前者Nutty香明顯，仲帶一絲辛香料香氣；後者口感更厚滑，甜感同朱古力香亦更突出。Cold Brew就會每日都有唔同SOE豆，採訪當日係一款尼加拉瓜日曬豆，偏茶感，帶熱帶水果甜香同少少酒香。
NACASA’s All Day Breakfast（$148）
Cafe常見嘅全日早餐亦落足心機，用自家慢煮手撕豬肉代替煙肉，一絲絲嘅豬肉食落柔嫩多汁，配酸種麵包或者就咁食都好味。酸種麵包外脆內軟，味道帶微酸。仲有炒蛋、香腸、烤蕃茄、薯餅、沙律同水果，豐富之餘又唔會太膩。
Pulled Pork, Scrambled Egg Sourdough（$118）
特別推介呢款慢煮手撕豬肉Open Toast，主角自家製手撕豬肉要用20小時製作，先慢煮十幾個鐘令豬肩肉變腍並鎖住肉汁，再花幾個小時慢焗最後用手撕成肉絲。豬肉加入中東香料，BBQ汁亦係自己調配，加入煙燻香氣，所以豬肉食落好惹味！配返炒蛋、Cream Cheese同Sourdough，口感層次豐富。碟邊紫色嘅係自家製藍莓果醬，用麵包點嚟食最夾。
更多【新店直擊】： |
Spicy-fried Chicken Burger with Fries（$108）
漢堡分量十足，雞扒加辛香料醃三個鐘至入味後油炸，皮脆肉嫩，咬開仲有肉汁！另一亮點係Spicy AF Mayo，係餐廳調配嘅辣味蛋黃醬，甜辣微鹹非常開胃。加咗椰菜絲沙律去中和膩度。麵包亦特別揀返Brioche，即係法式牛油麵包，比較軟同帶牛油香味，味道帶甜令漢堡層次更豐富。
Carbonara（$108）
餐廳選擇偏意式嘅做法，用Pancetta（意大利煙肉）代替一般坊間常用嘅美式煙肉，鹹度稍低但風味不減，所以呢份Carbonara食落唔死鹹又夠肉香。灑上手刨嘅意大利Parmesan Cheese，粉狀幼細加落Cream Sauce裡面更加Creamy。再配埋生蛋黃，撈勻嚟食真係夠晒香口呀。
選用香港較少見嘅AREMDE穿透式咖啡機，客人可以清楚睇到咖啡萃取過程
NACASA Café & Bar
地址：上環華里5號地鋪
文、相：Cathy
