喺K-11已經有間舖嘅韓國人氣雪糕店，喺同區另一個商場又開多間分店喇！新店開張當然會有新嘢食，好似原個芒果雪糕同抹茶tiramisu咁，睇得又食得！有啲新嘢仲係得新店先有供應添咋。

先講原個芒果雪糕，話夏天係芒果嘅季節相信冇人會反對，呢個新店限定嘅新鮮芒果牛奶雪糕，由頭到尾到返頭都係芒果！最底落咗層用新鮮芒果打成嘅芒果醬，唧完雪糕之後又落多層，再鋪滿一粒粒芒果肉喺面，真係一杯一個芒果㗎！好足料！果甜混埋奶香，噢，要投奔初夏啦~

抹茶Tiramisu都係新店限定嘅新品。參考tiramisu嘅概念，底層係抹茶芝士，中間夾有索晒抹茶Expresso 嘅手指餅，唧完牛奶雪糕後再撒上抹茶粉同黃豆花生粉，抹茶控應該會食得幾開心。

紅豆牛奶雪糕呢，就係重推嘅。用嘅係濟州紅豆，仲特地喺韓國訂咗幾個養生鍋返嚟，慢煮啲紅豆三個鐘，再以有機糖同少量鹽去作調味，令到紅豆唔會黏埋一堆，仍有咬口之餘亦唔會太甜。撇甩老拍檔抹茶，改同撒上花生粉嘅牛奶雪糕一齊，估唔到又幾夾。

除咗雪糕，新店仲有自製手工果醬多士呀，無論係塊厚多士定係啲果醬，全部都係自家製！麵包係有機牛奶麵包，質感鬆軟。而果醬就會按時令轉變，依家係無花果醬，係用以色列無花果肉切粒、煮醬而成，微甜帶有蜜香，呀，連片牛油都係自製㗎！混入乳酪去整，感覺light啲~ 預告下，遲啲仲會有意大ricotta芝士多士同手工牛奶醬多士食。四十幾五十蚊件厚多士，係就係貴咗少少，但貴在手工呀。

飲品方面，打卡-able嘅有濟州抹茶鮮奶咖啡，先落抹茶奶，加有機牛奶，最後倒埋expresso，啡白綠三隻色拼埋係幾靚嘅。

健康路線嘅就有幾杯梳打：五味子、鮮薑檸檬、鮮橙檸檬 ，果味突出又夠fresh，完全係消暑飲品。

百味堂
地址：尖沙咀廣東道3-27號海港城海運大廈二樓OT264號舖

文、相：Kar