中菜都有pop-up store？無錯呀，中環最近出現咗一間超神秘嘅中菜期間限定店，由即日起至12月5日營業。位置就相當隱秘吓，藏身於另外一間餐廳內，想入去都唔係咁簡單㗎，首先要尋找一名身穿白裙嘅女子，請佢帶領您通過隱秘嘅入口。一入到去就好似去咗仙境咁，原來餐廳室內設計以中國神話嘅神山「蓬萊山」為主題，純白色配上耀眼嘅金黃色，係好特別嘅中菜用餐體驗！

食物方面，主要供應中國南北菜系及素食菜式，由超過二十年經驗嘅主廚黃漢強操刀，亦同時邀請咗Grassroots Initiatives創辦人兼女主廚Peggy Chan作顧問，令大家食到不一樣的中式素菜。

避風塘椒鹽「鮮魷」($228)

以炸椰子肉取替平時食開嘅鮮魷，加入蒜頭、胡椒粉及辣椒等製成避風塘口味，炸香咗嘅椰子肉口感有少少近似魚肉，味道唔算太辣，但香口惹味。

北京素烤填鴨($238)

北京填鴨係唔少愛食中菜嘅人心頭好，用大樹菠蘿及炸脆嘅鮮腐竹作餡料，再加入牛油果及北京填鴨微甜嘅醬汁，整體真係有食緊片皮鴨嘅感覺！

新疆串燒「羊肉」($188)

新疆烤肉嘅素食版本！以猴頭菇、時蘿及辣椒等製成串，香料味較突出。

養生素老火湯($88)

好多時煲老火湯都會加肉令味道更豐富，而呢個素老火湯就用咗13種材料熬製六小時而成，材料包括椰子味濃郁啲嘅印度椰子、粟米、白木耳、薏米、栗子及腰果等，味道清甜。

貴州泡椒蓮藕($88)

貴州特色前菜，酸味比較重，如果愛食酸嘅人一定不可錯過。

河南炸八塊($428)

除咗素菜，餐廳亦有一系列中國南北菜式，好似呢味相傳係乾隆皇帝下江南時最愛嘅河南名菜，河南炸八塊。其實就係最基本嘅原味炸雞，不過其實原味就最考師傅功架，雞肉炸皮香脆薄身，肉質嫩滑juicy，好出色！

黑蒜蒸蟶子皇($328)

至於鍾意食海鮮嘅朋友呢道亦有得揀，呢道黑蒜蒸蟶子皇，蟶子皇大隻彈牙鮮甜，配埋吸收晒醬汁嘅粉絲食就完美喇。

椰汁奶卷炸兩($88)

甜品方面推介呢個椰汁奶卷炸兩，將中式炸兩及西式Custard結合，再加上椰汁，估唔到又幾夾。

中國白酒之旅($288)、層層蝶($88)、霧之戀($128)

餐廳仲有埋多款酒類選擇，包括試勻六款白酒嘅中國白酒之旅同埋啱晒打卡嘅Cocktails！

888   

地址: 中環干諾道中8號交易廣場1期4樓402號舖

文: Yanica

相、片: Tom Li