三十幾年前，喺秀茂坪邨35座對開就有個車仔檔賣車仔麵，一做就十六年，秀茂坪邨唔少街坊都係佢地熟客，不過因為拆樓關係不得不結業。不過最近佢地喺九龍灣重開啦，負責人就話，當初嘅車仔檔就係由佢地爸爸媽媽負責嘅，為咗令兩老開心同埋想將回憶嘅味道帶返比街坊，所以就決定重開。

新店淨賣車仔麵，湯底就用咗30磅豬骨，每日新鮮由朝熬到晚。車仔餸方面，有唔少係呀爸呀媽教落，由以前開始就有嘅懷舊餸，亦都有而家新店先有嘅車仔餸。

車仔餸就有成28款揀，如雞翼尖、牛腩、滷水豬腸、五香牛肚同南乳豬手。雞翼尖可以話係家的味道，用咗咖哩粉同黃薑粉等材料整，夠哂入味同離骨。

牛腩就用上牛坑腩，再用柱候醬加各式香料炆淋，軟腍入味。南乳豬手炆咗3-4小時，夠腍之餘仲好重骨膠原添。另外滷水豬腸都處理得好乾淨。

另外仲有一啲新嘅車仔餸，如秘製辣魷魚，魷魚爽口，辣汁惹味。店主話因為魷魚放得太耐就會縮，所以佢地每次都淨係可以整少少，賣完先重新再炒過。另外開飯仔私心推介蠔皇小花菇，炆到入哂味好淋。

另外鍾意辣嘅人就要試下佢地嘅秘製辣汁，加埋後又香又辣，成碗麵個味道又提升咗！

負責人就話，有唔少舊街坊見到佢地重開嘅消息都好開心。最令佢感動嘅係，有位坐住輪椅嘅舊街坊都特登返嚟搵返舊時嘅味道。

35座車仔麵

地址: 牛頭角牛頭角道3號得寶商場地下A1 號鋪

文、相、片: Yanica