海賊王粉絲期待咗好耐嘅畫面，下星期一就出現喇！黃埔間主題餐廳開喇！造型嘢食固之然多，仲有好多打卡位添！知你哋等唔切，即刻帶你哋去睇睇！

一入門口就會見到個甜品櫃，一頂頂路飛帽同Chopper帽排晒喺度，好鬼靚。路飛草帽係芒果mousse，Chopper嗰頂就係士多啤梨同raspberry嘅mousse cake。

另一頂路飛草帽，就係咖喱飯嚟。用飯粒砌咗頂帽出嚟，再用日式咖喱汁同安格斯牛肉粒圍邊。

至於藍色漢堡包，就係參考芬奇大將軍嘅前臂整嘅，印埋個星星標誌上去㗎。至於藍色包點整？咪又係蝶豆花嘅玩意囉。

其他菜式亦都係參考咗幾個團員嘅喜好或者造型而創作，好似BBQ雞翼咁，就係路飛嘅最愛；仲有呢個Jumbo肉盤，都係佢最鍾意食嘅全肉便當呀！一盤包晒肉腸、豬、牛、羊同雞，仲有燒菠蘿，配埋三種燒汁（傳統、薄荷、藍莓），啱晒食肉獸。而雞蛋仔棉花糖，就係Chopper嘅飛佛。

除咗可愛路線嘅嘢食，另外都有啲係行霸氣路線嘅。呢件牛扒，大塊到呢，望下望下，加少少想像，好熟口面咁，哦~ 係路飛開咗三檔後嘅巨人戰斧呀！巨型到我諗要4至6個人先食得晒。

呢碟串燒都唔嘢少，三串，啱啱好就係三刀流劍士卓洛嗰三把刀呀，你哋睇埋串燒柄就知㗎喇，係型嘅。

Menu上仲有其他好多款前菜、主菜同特飲呀，應該都可以滿足到各位粉絲嘅喜好。

等位嗰陣可以過隔籬睇住精品先喎，碟呀、杯墊呀、仲有毛巾、衫等等都有得買。

香港海賊王餐廳
地址：紅磡黃埔新天地第5及6期AEON STYLE黃埔地面G01號舖
開業日期：12月18日（下星期一）

文、相：Kar