粉嶺街坊注意！華明市場最近裝修重開，街市外圍新增小食街，營業至凌晨一點呀。有齊香口炸物、泰式串燒、即包燒賣、台式飲品、潮州粉麵、即炒小菜等，無論係掃街食小食定買嘢返屋企加餸都一樣方便。
 

泰國人主理地道小食　泰姐BBQ

豬頸肉（$38/份）、雞全翼（$12/串）、雞肉（$10/串）、豬肉（$10/串）

店如其名，搵嚟泰國大廚主理，泰式串燒先醃過，本身已經夠入味，配埋辣醬、酸辣汁就更加惹味香口。最出色嘅係豬頸肉，香得嚟唔會太肥，肉質爽口柔嫩，加餸最啱！
 

泰式雞扒撈檬（$32）

想飽肚啲亦有泰式船麵同撈檬，「檬」係越南話，即係米粉咁解。爽口米粉配店家嘅酸辣醬汁，再配埋酸蘿蔔就更醒神，夏天食夠開胃。雞扒皮脆肉嫩，同樣加分。
 

泰式鳳爪（$32）

舖仔細細但食物選擇唔少，熱賣嘅泰式鳳爪、泰式木瓜沙律（$25）、泰式海南雞（$68/半隻，$118/隻）等都值得一試。
 

拉絲香口芝士條　祥豐美食

芝士條（$12/2條）

呢間係華明邨舊店，主打港式小食同炸物，影相呃Like嚟講一定要數到芝士條，趁熱搣開芝士可以拉得好長！而且外面炸至金黃香脆，帶少少香草味道，完全唔油膩感。
 

煎安格斯牛柳粒（$25/6粒）

安格斯牛柳先醃過，用鐵板煎至約7成熟。食落有牛肉香同少少黑椒香，裡面亦成功保存肉汁，不過略嫌韌咗啲啲。
 

唔使入元朗都食到B仔雞翼　名店車仔麵

香辣雞翼尖（$20）

其實呢間係主打車仔麵嘅，不過佢地嘅香辣雞翼尖的確值得試下。以元朗佳記甜品必食嘅蒜辣雞翼尖作為靈感，同樣以蒜蓉同辣椒仔調味，辣勁較低雞肉入味，唔驚唔覺就會食完成份。
 

台中健康茶飲　手作功夫茶

38奶霸（$26）

呢間台式飲品店嚟自台中，特點係以蜜糖代替果糖，味道清甜亦令茶飲更順口。呢杯38奶霸一杯有齊珍珠、蒟蒻、仙草凍，配鐵觀音奶茶，有咬口得嚟仲要係三款唔同口感同味道。
 

輕飲水果茶王（$32）

雖然叫輕飲，但分量絕對唔細，用台灣高山青茶配橙、葡萄柚、西瓜、蘋果等鮮果，再配高纖嘅奇亞籽，清香消暑又健康。
 

 
新鮮出爐即包燒賣　燒賣王子

椒鹽炸燒賣（$15/6粒）

呢間燒賣專門店真係睇得到嘅新鮮，人手即包唔同口味嘅燒賣，蒸嘅時候仲有個計時器，完成前一分鐘就會響起，提提大家有新鮮蒸好嘅燒賣可以食！除咗之前推出嘅黑色墨魚汁燒賣外，另一款新品就係椒鹽炸燒賣，炸至外脆內軟再撒上椒鹽，香口惹味。
 

元朗彈牙手轆魚麵　潮記粉麵

四寶魚麵（$48）

總店係大埔嘅潮記魚旦王，手轆魚麵以刀削麵方式由魚肉製成麵條，所以食落特別彈牙，帶魚肉鮮香。
 

淨酸菜（$60/碟）

去潮州菜館必食嘅鹹酸菜呢度都有！鹹酸平衡，仲有少少甜味，先食少少開胃，再加落粉麵度食一流呀。
 

淨腩雜（$120）

小店嘅魚蛋同牛丸每日新鮮製作，牛腩牛雜等都係自家出品。呢份淨腩雜有齊牛腩、牛肚、牛筋等，每日用秘製醬汁滷5至6個鐘，保證入味。
 

每日現煮小菜　泰興食坊

重慶酸菜魚（$68）（18:00後供應，送白飯一碗）

每日供應唔同小菜，而且都係每日分兩輪現煮，Lunch Time有唔少街坊會嚟買三餸飯（$38），當中雞翼特別受歡迎。特別推介係晚市嘅重慶酸菜魚，酸香麻辣送飯最啱，魚肉亦夠嫩滑呀。
 

華明市場小食街
地址：粉嶺華明路21號華明市場地下

文、相、片：Cathy