清香嘅竹筒飯同香港人最愛嘅日本菜好似無乜關係？未必！九龍灣呢間新店就主打日式竹筒飯，以竹筒住煮北海道星丸米，配搭唔同日本食材，套餐包埋前菜甜品，夠豐富！而且特別為小朋友設計流水烏冬兒童餐，有得玩有得食，最啱一家大細去試呀。
 

柚子牡蠣竹筒飯定食（$88）

竹虎京堂嘅竹筒飯定食會有五味前菜、茶碗蒸同甜品，五味前菜會定期更換款式，不過當中一定會有一款刺身，而且口味各異。例如藍色碟仔裝住嘅係冰頭漬，即係用三文魚頭軟骨做嘅漬物，口感爽脆味道微酸，幾醒胃。
 

蠔會按時令選擇品種，例如開飯仔採訪呢日就係用廣島蠔，體積唔算大但勝在鮮甜多汁，配柚子味道清新。米選用北海道星丸米，暫時由呢度獨家引入！特點係米粒較大、甜味偏濃。而且從日本運糙米運到香港，送貨前先會打磨成精米，新鮮米粒嘅水分消耗較慢，煮出嚟自然粒粒飽滿軟糯。而且用竹筒蒸飯，有竹嘅清香之餘又可以保溫。
 

三文魚籽雲丹竹筒飯定食（$208）

海膽會按季節更換，最近就係時令嘅北海道海膽，海膽鮮艷橙黃，入口細膩甘甜，鮮味十足。其他食材亦相當講究，例如有日本和牛牛舌、九州地雞等等。另一個值得留意嘅係竹筒最多只會用15次，亦會先浸洗乾淨再使用，確保衛生。
 

海瞻天婦羅蕎麥麵（$148）

唔食飯嘅話亦有蕎麥麵同烏冬選擇，配搭唔同天婦羅。海瞻天婦羅炸至半生熟，外酥脆內香軟，更有口感而不失海膽鮮甜味。蕎麥麵嘅醬汁亦調味得宜。
 

 

京都流水手打烏冬定食（$68）

最得意嘅Set一定要數到呢個兒童餐，用Hello Kitty流水機裝住每日新鮮手打烏冬，睇住啲烏冬轉轉下，唔好話小朋友，其實大朋友都會覺得幾得意。配料有魚板串芝士薯仔、玉子、芝士年糕等，夠香口。
 

甲羅燒（$68） 

除咗定食，餐廳亦有供應刺身同前菜小食。甲羅燒嘅蟹膏香甜香濃，再加蟹肉同蔥花增加口感層次。
 

竹虎京堂抹茶拿鐵（單點$22/熱，$28/凍，或定食+$18）

選用日本抹茶配搭自家炭燒即磨咖啡，特別之處係上面有一層抹茶泡沫，係希望大家飲嘅時候先品嘗到抹茶嘅回甘茶香，再細味炭燒咖啡香醇。味道層次豐富之餘餘香悠長，口感順滑值得一試。
 

竹虎京堂
地址：九龍灣宏照道38號Megabox 10樓4號舖

文、相、片：Cathy