香噴噴又口感煙韌嘅肉桂卷，配一杯咖啡係咪你嘅Comfort Food之一？係嘅話唔好錯過呢間由美國開過嚟香港，有35年歷史嘅人氣肉桂卷專門店！新鮮出爐三款唔同口味嘅肉桂卷各有特色，甜而不膩。
 

Cinnabon於1985年喺美國創立，全球超過1,200間分店！香港首店位於奧海城，同美國店一樣，肉桂卷有經典、迷你，同一口三種大細選擇，無論係想自私食定開心Share都好方便。肉桂卷用小麥麵團加上印尼特製Makara肉桂粉焗製，一出爐就香氣十足。
 

經典肉桂卷（$38，另有迷你$29及一口$30/4件）

呢個品牌肉桂卷另一賣點係獨特嘅Ooey-gooey口感：一層層表面光滑，咬落軟彈煙韌！而想食到最好味嘅肉桂卷，記得即刻趁暖食，或者返屋企加熱食，肉桂帶微微辛辣嘅香料味會更突出，配搭招牌糖霜，香甜滿足。
 

朱古力卷（$42，另有迷你$32及一口$33/4件）

朱古力卷顧名思義，係用朱古力醬取代肉桂粉夾喺中間，上面同樣配以特製招牌糖霜。就咁睇以為會好甜？食起嚟一層層朱古力醬香味濃郁之餘，甜度亦適中，趁熱食仲有少少流心效果！不過朱古力醬都幾厚身，建議配咖啡或者Share食啦。
 

焦糖胡桃卷（$46，另有迷你$35）

甜中帶苦嘅焦糖同樣令人難以抗拒，呢個焦糖胡桃卷就喺經典肉桂卷上加上焦糖醬同胡桃，食起嚟多一重焦糖香之餘，再加上胡桃口感就更豐富。
 

 

肉桂脆片（$36）

除咗肉桂卷，仲可以揀肉桂脆片，一塊塊方便單手食，而且又唔使叮返熱，買多幾包擺喺辦公室或者屋企隨時食都得啦。
 

（左）Strawberry Yogurt（$38），（右）Oreo Chillatta（$36）

肉桂卷最啱配咖啡，所以香港店特別從一間日本咖啡豆烘焙室購入高質Arabica豆去調配各式冷熱咖啡。仲有其他特飲、梳打等選擇，特別推介Strawberry Yogurt，味道酸酸甜甜好醒胃。
 

最後提提大家，肉桂卷室溫可以存放兩日，而擺冰格雪藏就可以擺3至30日，包裝上都有清晰指示教大家點用微波爐或者焗爐翻熱㗎啦。
 

Cinnabon（2月7日開業）
地址：大角咀海庭道18號奧海城二期地下G06號舖

文、相、片：Cathy