灣仔最近新開一間餐廳，以意大利佛羅倫斯小餐館為靈感，主打一系列富鄉村風味嘅意大利菜式。最特別嘅係餐廳裡面特設乾式熟成機，將美國黑安格斯牛扒喺店內熟成，加秘製香料醃製再燒烤，肉味濃郁配紅酒一流。
 

Associazione Chianti位於灣仔船街，行政主廚Josh Stumbaugh秉承意大利托斯卡尼菜嘅特色「cucina povera」，雖然字面上解作「窮人美食」，但背後嘅精神係以當地最優質嘅食材以簡單嘅烹調方法演繹。
 

CROSTINI MISTI（$118）

前菜推介係呢款托斯卡尼小餐包，烘過嘅法包片上有三款抹醬：雞肝醬、蒜香蕃茄，同白腰豆醬。雞肝醬香濃而無任何腥味，蒜香蕃茄惹味同清新兼具，而白腰豆醬味道以腰豆同橄欖油香為主。建議從淡到濃嘅次序享用，即先食白腰豆醬，最後食雞肝醬餐包。
 

PECORINO AL FIENO（$168）

即係綿羊芝士，配以烤啤梨片同百里香蜂蜜。芝士經過熟成口感較硬，同時味道更濃郁，加上蜂蜜就襯出奶香同鹹味。而烤啤梨片香甜多汁，一甜一鹹配搭得宜。
 

TAGLIATELLE （$218）

餐廳嘅意粉全部都係店內每日新鮮製作，呢碟松露牛油扁意粉係托斯卡尼當地嘅經典菜式，先用牛油煮扁意粉，再加上意大利Alba當地出產嘅白松露片。白松露嘅幽幽清香同彈牙嘅扁意粉係無得輸嘅配搭。
 

GARGANELLI OMAGGIO A CAMMILLO（$188）

以佛羅倫斯著名嘅小餐館Trattoria Cammillo為靈感嘅意粉，用到嘅扭紋捲粉喺香港較為少見，有一層層口感，較為煙韌。配以Chianti紅酒牛肉醬同Parmesan芝士，紅酒牛肉醬味道濃郁，香而不膩。
 

 

BISTECCA ALLA FIORENTINA（$1198，Serves 3-4）

餐廳所有牛扒都係選用嚟自美國愛達荷州牧場嘅Prime cuts黑安格斯牛，再經過乾式熟成。招牌係佛羅倫斯T骨牛扒，足一公斤可三至四位分享，以Chianti秘製香料醃製後放喺特別訂製嘅托斯卡尼烤架上燒至Medium rare。
 

而原來喺佛羅倫斯人心目中，牛扒唔夠三隻手指厚嘅唔可以叫牛扒，只可以叫生牛肉片！呢度嘅牛扒自然分量十足，而T骨牛扒更可以同時享受到西冷同牛柳兩個部位嘅特色，前者有嚼勁後者軟嫩，同樣富牛肉香味。
 

TIRAMISU（$78）

MADORLE E OLIO（$88）

MERINGHE（$88）

甜品同樣充滿意大利特色，Tiramisu咖啡香濃郁，甜中帶醇。蛋糕口感濕潤扎實，配輕柔嘅忌廉同多汁嘅士多啤梨啱啱好。而蛋白餅配搭忌廉、雜莓同朱古力，口感同味道層次豐富。
 

Associazione Chianti
地址：灣仔船街15號寶志閣地下2號舖

文、相、片：Cathy