今年似乎都去唔到旅行，煲劇煲到掛住巴黎，不如去呢間新開嘅法式餐廳止癮！開喺太子花墟道附近，白色店面加上裡面色彩繽紛嘅吊燈好易認。Menu唔算好多選擇但勝在應有盡有，從咖啡、甜點、輕食，到主菜都有齊，而且既有傳統口味亦有創新元素，例如加入鹹蛋嘅拿破崙你又試過未？
 

Le Reveur位於太子花園街，店名係「白日夢」嘅法文，環境亦充滿優雅夢幻嘅感覺：彩色吊燈、植物牆紙、鮮花擺設、黑白藤椅等，加上落地玻璃窗真係好啱打卡。菜式定價親民而用料考究，例如選用法國進口牛角包、香港本地農場嘅沙律菜、嚟自花墟嘅新鮮食用花。
 

香榭麗舍特級早餐（$108）

Cafe常見嘅全日早餐都可以變法式！呢份特級早餐包括牛角包、鹹味馬德蓮及可麗露、法式炒蛋、油漬蕃茄伴扁豆、沙律、圖盧茲香腸、煙肉。綠扁豆（Lentils）係法國菜常見食材之一，唔易熟因而保留到一粒粒口感。鹹味馬德蓮同可麗露都帶香草味，前者外脆內軟有鹹香，後者外殼焦脆裡面濕潤。
 

海鱸魚、小棠菜及車厘茄龍蝦汁意粉（單點$128，Dinner Set $148 包沙律/餐湯及$35以下飲品）

海鱸魚肉質結實鮮美，廚師更特別將魚肉切碎，方便大家食意粉嘅時候每啖都食得到魚肉。龍蝦汁味道香濃而唔過鹹，配搭本地種植嘅小棠菜、酸酸甜甜嘅車厘茄，整體味道豐富而唔膩。
 

鹹蛋無花果拿破崙（$78）

甜品亦見心思，呢份鹹蛋無花果拿破崙就用法式千層酥，夾自家製鹹蛋黃吉士同無花果。吉士夾心加入鹹蛋黃蓉係為咗糅合香港元素，柔滑當中帶少少鹹香。酥皮就嚟自法國，口感酥脆富牛油香。配埋微甜嘅無花果估唔到又幾夾，不過就略嫌牛油香蓋過鹹蛋黃嘅鹹香。
 

 

法式橙酒班戟（$68）

班戟用法國香橙干邑甜酒同橙汁煮過，再以脆焦糖慢煮橙片點綴。聞起嚟有淡淡酒香，而食落就以橙嘅酸甜味為主，香氣自然。難得嘅係班戟煮過口感保持到軟滑而唔爛，層層分明。
 

巴黎人朱古力（$40）

將比利時70%朱古力粒同熱牛奶分別奉上，可以自己攪拌出屬於自己嘅熱朱古力！因為用嘅係黑朱古力，所以甜度比坊間一般嘅熱朱古力嚟得低，朱古力香氣比較突出。提提大家雖然裝朱古力嘅杯亦有預先加熱，但建議大家都係盡快倒入熱牛奶，如果唔係朱古力就比較難完全融化，口感就無咁滑喇。
 

手沖咖啡（$68-$128）

餐廳用嘅咖啡豆主要嚟自本地烘焙Craft Coffee Roaster出品，亦會不時引入Guest Bean。例如開飯仔採訪當日就有由香港人喺加拿大開設Moving Coffee Roastery嘅兩款單品豆，呢杯用嘅係Moving Coffee Roastery埃塞俄比亞水洗咖啡豆，酸味明亮而且風味乾淨，帶出柑橘甜味。
 

Le Reveur At Flower Market
地址：太子花園街244-246號惠寧閣地下B號舖

文：Cathy
相、片：Tom Li