方格階磚地板、吊扇燈架、牌匾、舊式汽水雪櫃同埋卡位旁嘅舊信箱，都令人彷彿置身於六、七十年代嘅香港。講緊嘅唔係咩博物館，而係九龍城新開嘅火鍋店。呢間火鍋店裝修以舊香港風為主題，食物方面除咗懷舊點心同小食，仲有唔少新口味火鍋湯底同點心新食法，樣樣都真材實料㗎！
招牌花甲蟹海鮮鍋(泰湯)($388)
湯底可以話係打邊爐嘅靈魂，呢度就有供應六款自家製湯底，當中以招牌花甲蟹海鮮鍋(泰湯)最受歡迎。湯底採用花甲、蝦、蟹等海鮮，再配上秘製酸辣湯、泰式海鮮醬、薑、香茅及芫茜等配料熬煮三小時而成。味道似冬蔭公咁酸酸辣辣，另帶有濃郁海鮮甜味，夠晒開胃！
火焰雞鍋($168)
重口味人士就要食雞煲啦，呢個雞煲除咗有Fire show 睇外，店主私心推介要加啲吸味配料落去一齊食，如加入黑栢葉($68)、鵝腸($78)、鹵大腸($68)同埋特色蝦米腸粉($38)落去炒香，雞鍋嘅味道滲晒入每一種食材到，好惹味～
鵪鶉蛋燒賣($48)、特色蝦米腸粉($38)
火鍋店仲創立咗新嘅點心食法，就係將點心當火鍋配料，鵪鶉蛋燒賣而家已經少見，用嚟打埋邊爐真係買少見少，質感扎實彈牙，估唔到又幾夾。蝦米腸粉口感似河粉，有淡淡蝦米香。溫馨一提腸粉比較易散，放落鍋淥一淥就食得啦～
日本飛驒牛(細$328/大$498)
打邊爐又點少得牛肉，日本飛驒牛無論脂肪比例、色、香同紋理都係最高評級，靚到可以當刺身食添啊。記得淥到微微粉紅色就拎返上嚟啦，果然係入口即溶～
鵝肝墨魚丸($58半份/$98一份)、火爆牛丸($48半份/$88一份)、梅菜豬肉丸($43半份/$78一份)、蝦丸($48半份/$88一份)、鯪魚丸($38半份/$68一份)
所有丸類全部都係人手自家製，好彈牙。蝦丸同鯪魚丸以新鮮蝦及鯪魚肉製成，火爆牛丸食完真係有火辣辣嘅感覺，食得辣要挑戰吓！
火鍋湯滾糖不甩($48)
餐廳內最具特色嘅，呢味湯滾糖不甩一定係其中之一。將糖不甩放落湯底灼熟，糖不甩有陣陣湯香，沾埋花生碎一齊食，既有湯底咸香，又有甜甜嘅花生味，原來糖不甩可以咁食！
懷舊綠寶橙汁($13)
七十年代無人不曉嘅綠寶橙汁呢度都有得飲呀喂！店主特意引入泰國版嘅綠寶橙汁，為嘅就係希望畀港人飲返童年嘅味道。
同場加映！餐廳內仲有個小角落賣龍鬚糖、芝麻糖、叮叮糖同糖蔥餅等懷舊小食，真係咩回憶都返晒嚟～
地址: 九龍城打鼓嶺道70-72號地舖
文、相、片: Yanica
