想掃街，除咗旺角同葵廣，荃灣通常都係另一個選擇。而最近，荃灣有個廣場新開咗成層美食層，可以嘆住冷氣咁掃街，又或者坐低慢慢食都得。暫時有10間小食店開咗，由玉子燒、麻辣燙到雪糕窩夫都有得食！
呢度有飯有麵有糖水，其中有道西冷牛肉醬撈麵，同平時啲撈麵稍稍有啲分別。夾晒啲配料同牛肉醬之後，仲會連同個麵一齊落鑊兜幾兜，令啲麵同醬料更勻旬，食落更入味。另外有雪梨糖水，全日keep住煲熱㗎，都幾甜下，但就唔多食到啲雪耳。
睇個名就知係食雪糕，呢度嘅雪糕啲口味都幾特別，除咗一般嘅雲呢嗱、芒果之類，仲有奶茶、芝士、金莎脆皮朱古力等等。另外仲有各式嘅甜品，好似棉花糖雪糕窩夫同藍色嘅芝士窩夫配岩鹽雪糕咁。
鍾意食辣嘢嘅人，呢間就應該係首選嘞。有一串串豬、雞、牛、丸、菜等等，鍾意樣執邊樣，再交畀店員將佢變成麻辣燙，個湯底用咗成10幾種香料製㗎，嫌唔夠辣嘅，仲可以後期自己加辣粉同辣汁！不過講真，辣味唔錯，麻就唔多夠喇。
另外，佢哋主打正宗文昌雞，仲可以將隻文昌雞用口水雞做法整出嚟，成碟都紅卜卜咁，幾有色水。單嗌例牌又得，跟餐配飯同飲品都得。
另一間都有辣嘢食嘅係3兄弟，有啲麻辣小食同手撕雞。手撕雞配腸粉再加甜、麻醬同芝麻，又係另一番風味。不過，都係辣嘅食得開心啲。
油渣麵都幾大碗下，面頭舖滿榨菜、冬菜等料，夠麻甩，幾啱啲得自己一個人開飯嘅仁兄。
時下潮流大愛嘅玉子燒，可以喺呢間舖度搵到，有黑松露、芝士、櫻花蝦等味選擇，睇住師傅將隻蛋翻完又翻又再加蛋漿咁，製成品都幾厚身！怕肥嘅可以叫佢最後唔好落太多沙律醬呀。
同層另外仲有幾間舖頭，包括食車仔麵嘅藞蒫麵 、雙餸三餸飯嘅靚太煮意、有雙色冰花餃嘅顯徑揚揚，同埋主攻特飲嘅POP UP CAFÉ，而素食嘅朋友仔，一樣有得揀，茹素人家有蕃茄素豬扒飯、芒果Pizza等等。
「大食皇」
地址：荃灣大河道18號地皇廣場1樓美食廣場
文、相：Kar