\r\n《蓮香一角》\r\n\r\n筆者原本有星期二例會，為了吃麻蓉包及消防員二號，也都提早了開會時間( 當然亦趕住各同事唔好咁多野講，唔好阻住我飲茶) 。一時正，來到蓮香樓，照舊的人馬踏雜，熱鬧不已。極目四望，都係見不到消防員一號及二號的影踪，再走多轉，都係唔見人……。\r\n\r\n弊！弊！弊！弊！弊！似乎我們這餐茶聚的第一個里程碑( milestone ) 是達不到了，以項目管理來說，「Slippage of The First Milestone 」是非常不利同麻煩的一件事。當下就諗，不如走人？又不如係咁易坐低，拿拿林食完就走？又或者……？好在這時救星到，就係見到Olivian 的到來，大家略作商量，就決定繼續等，因為我們都同意，就算走，也要等其他的食家到來吧！\r\n
\r\n《中午在中環飲茶, 搵位不易》\r\n\r\n兄弟姊妹，做野！去等/搵位！！\r\n\r\n混亂中，MM1970 及消防員一、二號都陸續出現，怱 怱 的打個招呼，也就二話不說的四散在蓮香樓各處等位。難得的是，各食家雖然認識的日子不深，但為左食，在必要時也是很有默契的。相信在本地酒樓陸續的轉為派飛等位後，大家也沒有什麼在人家背後等位飲茶的經驗吧！這時正好給大家一個機會去用自己的觀察力去衡量那張檯較快走，又無人等的了。\r\n\r\n幸運地，等了不用十分鐘，就已經有位了，還可佔半張圓檯，四個人就可以鬆動的坐下來。此其時，Ray 亦已到。數數人頭，Olivian 問：「仲有Lazyqueen喎！」但左望右望都不見她，唯有開埋佢個位，我地就食先。( 後來才發現原來Lazyqueen 都一早來到，但因為現場情況太混亂，以至大家不能相認。而不幸地大家亦沒有對方的電話號碼，令她以為約會取消，要自己去食麵。真係唔好意思，唯有下次再飲過啦！) \r\n\r\n
\r\n《伙記的滴水不漏功架》\r\n\r\n八籠點心‧一個湯飯‧一碟小菜\r\n\r\n坐低第一件事當然係開茶，伙記問：「要茶盅定茶壺？普洱定壽眉？」一場來到，當然是：「茶盅、普洱，唔該！」伙記拿了四套茶盅來，快手的幫我們開茶，那份過頭沖滾水、又滴水不漏的功架，沒有十年八載的功力，也不易勝任。到用茶盅沖茶，意外的發現，原來各食家都深諳此道，用起來一點難度也沒有。食家果然是食家，不是時下只懂咖啡、芝士餅、菠蘿包、蛋卷的後生仔女。\r\n\r\n
\r\n《雞扎》\r\n\r\n呷一口濃濃的普洱，叫了碟生炒骨及鴨腿湯飯，便要立即去拿點心。談起吃點心，筆者一向是「主動出擊派」，不會被動的等點心車到檯前才看有什麼想吃。一於脫下西裝，摺高衫袖，就出去搵食。轉眼間已拿了幾籠點心，有馬拉糕、千層糕、蓮蓉包、麻蓉包、豬肚、雞紮、山竹牛肉及後來的火腩卷。\r\n\r\n
\r\n《千層糕/ 馬拉糕》\r\n\r\n舊式茶居，點心大都不修邊幅，硬橋硬馬以實際為主。馬拉糕幾大件，五個人吃到最後都吃剩一小舊，是唯一吃不完的點心；千層糕有幾厚的奶皇在其中，甜到漏，幾個人分吃就最適合；\r\n\r\n
\r\n《上者為蓮蓉包, 下為麻蓉包》\r\n\r\n蓮蓉包及麻蓉包，雖以前者較出名，但相比之下筆者是絕對推薦麻蓉，麻蓉餡是真的以白芝麻做的，香味足亦飽肚，照Olivian 的意見，獨吃就太膩，也是二人分吃一個較好；\r\n\r\n
\r\n《雞扎/ 豬肚/ 山竹牛肉》\r\n\r\n山竹牛肉是另一實力點心，雖然一碟只兩粒，又個子不大。但結實的牛肉球，加上點點的陳皮味道，是時下大路酒樓食肆，幾難找到的；\r\n\r\n
\r\n
\r\n《火腩卷及內裡的火腩》\r\n\r\n後來的火腩卷是其中一樣懷舊點心，不是度度有得供應，亦不是人人敢食，今天坐得低的當然不怕，亦令我想起好此道的雪怡，可惜她今天另有約，不能來。個人覺得，識食和敢食，才有意思。火腩卷內有芋頭及五花腩一片，充實非常，可惜五花腩不夠油、亦不夠腍，如果不是就更佳。\r\n\r\n\r\n
\r\n《20 蚊一碟生炒骨》\r\n\r\n生炒骨是今天的特價小菜，Olivian 是咕嚕肉/ 生炒骨/ 沙拉骨大王，當然要叫一碟來試試。生炒骨是大路貨色，碟頭一點也不少，應該是一早炒埋一大窩，有人叫就上碟的，但只20 蚊一碟，一般而言加碗白飯又一餐，又真係幾抵的。\r\n\r\n
\r\n《鴨腿湯飯》\r\n\r\n鴨腿湯飯是另一傳統菜色，鴨腿連湯一盎，飯就一大碗另上，方便分吃亦不會泡到飯腍晒。鴨腿味道一般，湯則幾好味，起碼味精下得少，是瓜粒湯飯以外的另一個夏日時令食品。\r\n\r\n摸住茶杯底傾計\r\n\r\n一輛風捲殘雲，大家也飽得八八九九。Olivian 因公事要早走，就剩下幾個男生在飲茶吹水。如常的話題是天南地北，不著邊際。一時談大喜慶，一時又由消防員一號說湊仔經；這裡剛說著日本經濟，話題一轉又去到Openrice 現時火熱的「逐間餅店、逐個麵包寫食評」上；又看著消防員一、二號，令我們明白有其父必有其子的道理，看兩歲的消防員二號，他的搶吃能力及意欲，絕對不比其父輸蝕啊！\r\n\r\n說說笑笑，渴著沖極滾水都咁濃味的普洱，不知不覺已二時多，大家也是時候回到工作崗位了。\r\n\r\n埋單計數，只吃了二百多，計起吃過的點心及靚茶，個人覺得是非常抵吃。\r\n\r\n
\r\n《蓮香一角》\r\n\r\n後話\r\n\r\n八月食家的聚會是一個接一個：先是兩次車品品，再來是桃花源，之後是彭慶記，隨之而來的是雅閣，相信蓮香樓是最後的一個，原因不為其他，只因已八月三十一日，八月也不能再有聚會了，下次再約已是九月東寶之約，到時會見到大家嗎？\r\n\r\n\r\n文: Gourmet KC 攝影: MM1970 編輯: Ray\r\n