融化少女心銅鑼灣Dazzling新蜜糖吐司

無論你係咪少女，平時鐘唔鐘意台灣都好，都應該聽過嚟自台灣Dazzling Café嘅大名。舊年終於嚟香港喺尖沙咀開咗第一間分店，而家仲過埋海喺銅鑼灣開咗第二間以Garden為主題嘅分店。唔單止招牌蜜糖吐司有Upgrade，仲加推銅鑼灣店限定餐點！

見到咁Fancy嘅蜜糖吐司，無論你係真少女定老少女都會被融化！銅鑼灣店會推出一系列第二代蜜糖吐司，第二代即係將普通吐司Upgrade變成丹麥吐司。例如呢款藍色莓樂蒂丹麥吐司底部就有四塊鬆化嘅丹麥吐司。

丹麥吐司比一般吐司更多層次更有鬆軟口感，食落有少少牛油香同奶香。而深紫色嘅藍莓果醬入口無想象中咁濃，反而係微酸，平衡返蜜糖丹麥吐司嘅甜味。果醬下面嘅雲呢嗱雪糕亦夠滑，點埋一齊食啱哂。另外亦有Creamy吉士同士多啤梨，都係同丹麥吐司一齊食嘅Perfect Match。唯一可惜嘅係藍色馬卡龍雖然夠靚，但咬落比較實而且無乜杏仁香，唔係正宗外皮酥脆裡面柔軟嘅馬卡龍。

另外一款提拉米蘇丹麥吐司一樣有四塊丹麥吐司，Topping改為咖啡雪糕、鮮忌廉、朱古力醬同可可粉。咖啡香味濃郁，忌廉亦夠香滑，夾埋丹麥吐司一柔一脆口感豐富。伴碟兩塊脆餅中間夾住嘅Expresso忌廉亦係加分位。

如果覺得咖啡口味都會太甜嘅話可以試呢個巧達芝士丹麥吐司，今次吐司上面喺吉士醬同車打芝士，所以入口先會試到Creamy吉士醬嘅奶甜味，然後食到面頭比較硬身嘅芝士嘅鹹味。如果係甜魔亦可以自己添加蜜糖。

同場加映銅鑼灣店限定餐點，滿足甜品胃之餘都要滿足埋正餐個胃嘅。小食有呢款墨西哥辣椒豬肉薄餅，夠薄嘅墨西哥薄餅皮包住芝士、洋蔥碎、豬肉碎、墨西哥辣椒碎再烤焗。就咁食就係香脆當中帶少少辣，點埋旁邊嘅莎莎醬增加酸味就會感覺更清新開胃。

麵食就有番茄明蝦義大利麵，蕃茄紅醬加蒜末同洋蔥碎炒香後加入蝦仁同番茄仔，最後加埋香草同芝士粉再上碟。味道微酸富大蝦同香草香味，蝦肉爽口麵條亦煮得軟硬適中，而且醬汁濃稠程度啱啱好，麵條可以掛汁之餘分量亦夠。不過分量就細咗少少，男士自私食都可能未夠飽。

最後仲有兩款銅鑼灣店限定飲品，凍嘅有Dazzling Café Garden 特調冰茶，以清新嘅青瓜、香甜嘅香梨搭茉莉綠茶，襯返哂銅鑼灣店Garden嘅主題。溫馨提示一句記得先搞均杯冰茶，有時糖漿沉咗喺底一飲就只會飲到糖漿。熱嘅就有海鹽焦糖歐蕾，用少少海鹽吊出肉桂焦糖牛奶嘅香甜，Sweet得嚟有層次。

Dazzling Café Garden暫時都仲係試業階段，大約三月先會正式營業。裝修以英式田園風為主，少女們最愛嘅兔耳櫈變成自然木色。想影相靚啲嘅可以考慮坐喺有自然光嘅窗邊，不過Dazzling Café未開放訂位，想坐兔耳櫈或者窗邊都要睇運氣啦。

隨時接收最新資訊
讚好OpenRice專頁！