又到咗浦cafe時間！今期介紹幾間近幾個月先開嘅特色cafe畀大家，平時想搵個地方chill吓嘅朋友記得bookmark啦～

超紅網上卷蛋實體cafe Jen Cafe

圖：sleepbeauty

好紅嘅人氣卷蛋終於開實體店啦！位於深水埗走簡約柔和木色調，近門口果兩張枱超適合打卡～必食當然係招牌卷蛋，Top1係呢款京都焙茶芝士奶蓋卷蛋，蛋糕體濕潤軟熟，焙茶忌廉好香濃甜度恰到好處，配上厚滑鹹香芝士奶蓋茶香更為突岀，週末仲有限定芋泥卷蛋同烏龍珍珠奶奶口味。另有供應少量鹹食如叉燒滑蛋酸種麵包及豬柳貝果等。鍾意抺茶嘅一定要試佢哋嘅Matcha Latte，抺茶粉有六款可供選擇，由最基本嘅丸久小山園到薄茶級嘅又玄都有，好貼心。

Soho區意式糕餅店 AMO.AGO

圖：Maurice Ngan

以拉丁文命名嘅咖啡店，意思係I love同I Do，好浪漫呢～小店主攻Pastry，下午茶亦會供應精緻甜品。想試一間西式餅店嘅實力，當然要食吓佢哋嘅原味牛角包，牛角包鬆脆又唔會油膩，定價亦非常貼地。蛋糕就幾推介Strawberry Shortcake，外層鋪滿開心果仁碎粒，比起一般嘅多咗份果仁嘅香氣同口感。

班戟漢堡+黑松露炒蛋pancake Wooo

圖：Rachelwithfood

香港都有班戟漢堡食呀！灣仔呢間新開嘅cafe主打創意西式料理，必試有Pancake burger，同日本嗰款就有啲唔同，3塊美式薄班戟夾住流心嘅太陽蛋、煙肉同蜜糖，甜鹹嘅配搭一樣咁好味！黑松露炒蛋班戟都值得一試，炒蛋配嘅係厚班戟，一入口好香黑松露味，好嫩滑，班戟上灑咗海鹽同蜜糖，層次感好豐富。

大自然山景木系cafe 高山文化咖啡廳

圖：cw.foodie.hk

想搵個地方放鬆吓嘅，位於高山劇場旁呢間木系咖啡店就啱晒，窗邊落地大玻璃可以欣賞到大自然山景。食物選擇唔多，主要提供輕食、甜點同飲品，菜式都幾健康，All Day Breakfast用上慢煮雞胸配炒蛋，雞胸同炒蛋都幾嫩滑。煙三文魚酸種麵包配紫薯蓉幾新穎，但微甜紫薯蓉配煙三文魚出奇地好食～

特色海鹽菠蘿酥 Bougel Cafe & Bakery

圖：Early_bird

屯門呢間區內人氣小店最近搬家了，地方大咗又靚咗，室外格調走清新田園風，入面就帶點懷舊日式咖啡廳味道。供應一系列創意麵包，如海鹽菠蘿酥，鹹香嘅酥皮好脆，微甜嘅菠蘿餡料仍保留口感。芋泥麻糬鬆餅都推介，麻糬好軟糯做到拉絲效果，芋泥都好真材實料。佢哋嘅Latte真係打卡一流，超用心嘅櫻花樹圖案，紫薯同抺茶味都幾好飲～

文: Yanica