想搵一間高質嘅朱古力？西班牙朱古力大師級品牌Casa Cacao正式進駐尖沙咀，於啱啱開業嘅Cupping Room打造期間限定店，亦係品牌於海外首間分店～品牌由著名米芝蓮三星級餐廳El Celler de Can Roca所有，並由曾奪得「世界最佳甜點主廚」殊榮嘅甜點大師Jordi Roca主理。

Casa Cacao主打「Bean-to-Bar」朱古力概念，完美結合咗朱古力工廠、零售店及咖啡室，主廚及其團隊從哥倫比亞、厄瓜多爾、委內瑞拉、秘魯、多米尼加共和國及印度等地嚴選當地可可豆。當可可豆抵達赫羅納Casa Cacao工場後，就會經過手工分揀、烘焙、開殻研碎以及篩選嘅過程，然後同有機蔗糖及可可脂混合，跟住進行精煉過程至少48小時，以確保朱古力入口幼滑如絲。

今次海港城Pop-up店，除咗有獨立包裝唔同味道嘅特色朱古力，仲有供應禮盒裝及朱古力熱飲～首先講吓獨立包裝朱古力，由唔同原產地區到唔同可可比例都應有盡有。鍾情黑朱古力嘅客人可以選擇由66%至80%可可嘅五款唔同口味。同時，牛奶朱古力迷可以試吓四款由45%到60%、以綿羊和山羊奶、以及傳統牛奶炮製嘅朱古力。另外Pop-up店中亦會供應兩款以70%委內瑞拉可可製作而成嘅埃塞俄比亞咖啡口味以及柑橘甘草口味。

因為就到新年及情人節，品牌亦有推出朱古力禮盒套裝，如32粒裝朱古力Bombones禮盒，包含八個口味朱古力，口味有秘魯Pirua可可豆、檸檬皮+葵花籽及12年amontillado雪利酒等！

不可錯過仲有Casa Cacao招牌熱朱古力，由72%於印度喀拉拉邦凱思帕拉森林中種植同發酵嘅可可製作而成。呢款熱朱古力散發淡淡嘅葡萄乾同杏子香氣，而且味道唔會過份苦澀，甜酸度完美平衡。另外仲有摩卡咖啡特飲～

Casa Cacao x Cupping Room Coffee Roasters

地址: 尖沙咀廣東道3-27號海港城海洋中心3樓309號舖

文、相: Yanica