被網民們視為女神般追捧嘅何家最索千金超蓮BB進軍飲食界，將台灣玖五牛肉麵引入到港，並喺灣仔開舖頭。到底呢間牛肉麵店有咩過人之處，令超蓮BB愛到將佢帶番香港呢？

首先介紹番，呢間台灣玖五牛肉麵開舖至今已有56年歷史，由謝老闆一家經營。雖然只係家庭式經營，但其正宗嘅口味深得台灣食客愛戴。佢哋亦非常著重食物品質，所以今次可以成功帶嚟香港，超蓮BB都話事前都遊說咗一段時間，謝老闆先肯應承咋！

而牛肉麵湯底則以大約15-20斤美國牛骨、洋蔥、薑等配料一同去熬煮超過48小時，令精華盡收於湯底之中。不加任何味精之餘，仲會加入由台灣運來嘅藥材湯包，令湯底滲有輕微藥材香。然後再根據客人柯打，喺麵條中淋上不同湯底。紅燒湯會再加入秘製香料；麻辣湯會再加入自家炒嘅6、7款香料加辣椒；番茄湯則先將牛肉炆好再一同煮湯。

舖頭廚師喺開舖前專程飛過去受訓，學習各款菜式煮法，務求做到與台灣店無異。店子主打嘅紅燒招牌三合一($95)，一碗集齊牛肉、牛筋、牛肚3個部位，好豐富。牛肉柔韌有致，亦帶點微辛感，牛筋熬得軟腍，牛肚爽而有嚼頭。

開飯仔就較為喜愛番茄味嘅招牌三合一($95)，除咗牛肉牛筋牛肚，配料還有與湯底一同熬煮嘅白蘿蔔、紅蘿蔔，非常入味。齋睇湯色與紅燒湯不太有分別，不過味道少一分微辛，多一分清甜；麵身粗而扁身，外形都幾似意式扁意粉，但比較油光啲，而且口感亦滑溜啲。

呢款質地較乾身嘅牛肉拌麵($78)係超蓮BB嘅最愛。配料好簡單：上面提及嘅麵條、醬汁及啖啖牛肉。最好食嘅靈魂就在醬汁，以豆干粒、肉燥、沙茶醬、烏醋等約10款配料做成醬汁，再加少少紅燒牛骨湯，令麵條不致於乾成一餅餅，非常惹味。

餐廳不只招待一眾嗜牛嘅牛魔王架，除咗牛肉麵仲有麻醬麵、炸醬麵以及玖五特製涼麵。涼麵以另一款嘅台灣麵條、芝麻醬、青瓜絲等配料而成，好啱夏天食。麵質好似陳家涼麵咁清涼Q彈，嗜辣嘅話更可以加入少許特製辣醬架，連veggie都食得！

小食方面，餐廳有一系列滷水及麻辣小食，上行有麻辣鴨血($32)、滷牛肉($48)、豆魚($32)；下行有滷百頁豆腐、滷甜不辣、滷豆干，3款共$28。開飯仔推介香港少見嘅豆魚，即腐皮包芽菜，由廚師包好後再煎香而成，食嘅時候沾少許芝麻醬更好味！

餐廳約有7-8款台式飲品，開飯仔推介（左）台式珍珠奶茶，相比一般嘅黑糖珍珠，白珍珠口感會再煙韌啲，而且甜度亦較低，怕肥女生都食得，價錢為$29；而（右）冬瓜檸檬茶，味道清甜解渴，值得一試。加埋白色珍珠，口感更佳，價錢為$31。

出餐口上面有幅牛肉麵嘅壁畫，加上旁邊嘅兩副對聯，令店內環境頓時增添幾分文青味。

超蓮BB話，餐廳將於4月11日正式開張，遲下更會推出限定嘅明星主題菜式，好似超蓮紅棗水、G.E.M或霆鋒牛肉麵等等，粉絲們一於約齊friend食番餐先啦！

玖五牛肉麵
地址：灣仔駱克道399號地下

文：Joy