各位牛魔王平時想食韓牛可能都要就住就住，今次元朗呢間火鍋店就有得用一個價錢，九十分鐘任食韓國濟州島出產1++韓牛！而且用平板電腦落Order後，牛肉透過路軌直送到枱邊，想Encore幾多碟都咁方便呀。
 

韓國國寶級韓牛

大谷倉午市同晚市都有提供五種牛肉火鍋放題，當中最特別嘅一定要數到坊間少見嘅韓牛！因為韓牛供應唔多，最頂級嘅1++嘅更加珍貴。而餐廳供應嘅係嚟自韓國濟州島嘅韓牛，油脂分佈平均，顏色較深而牛肉香味亦更濃郁！
 

而湯底就有清湯、豚骨湯、地獄湯、番茄湯、壽喜燒，同雪濃湯（+$10）選擇，亦可以選擇鴛鴦湯底（每位+$8）。自認係牛魔王嘅話可以揀雪濃湯，奶白色嘅牛骨湯味道鮮甜，更添牛肉香味。而壽喜燒咸甜平衡得宜，番茄湯微酸開胃，各有捧場客。
 

五款牛肉介紹

頂級國寶1++韓牛（放題午市成人$248，小童$228；晚市成人$428，小童$288）

五款套餐當中價錢最高，但亦係當中牛肉香味最為濃郁嘅。油脂分佈平均，花紋有如大理石。而且牛肉顏色比香港人食開嘅和牛深，皆因濟州島山水鐵質較高，當地出產嘅韓牛自然亦有較多鐵質。牛肉厚度得宜，有少少筋位，所以既有少少牛脂嘅入口即溶感，又有牛肉嘅嚼勁。
 

精選國寶1++韓牛（放題午市成人$208，小童$188；晚市成人$388，小童$228）

精選韓牛質素亦相當唔錯，比頂級韓牛少一啲牛肉香，但食落肉汁鮮甜味更突出，而且幾乎無渣。兩款韓牛都建議灼至半熟，口感軟嫩而且保留到肉汁。唔洗點太多調味料，因為韓牛獨特嘅甘味已經非常足夠。
 

安格斯牛肉（放題午市成人$188，小童$168；晚市成人$268，小童$168）

唔少香港人打邊爐都鍾意食安格斯牛肉，貪其油花均勻而且肉質軟腍。雖然相比起韓牛，安格斯牛肉嘅香味係次一級，但如果你想用平少少嘅價錢任食牛肉，安格斯依然係一個唔錯嘅選擇。
 

美國牛肉（放題午市成人$128，小童$108；晚市成人$198，小童$108）

澳洲牛肉（放題午市成人$98，小童$78；晚市成人$178，小童$78）

最後仲有美國同澳洲牛肉。美國牛肉脂肪較多所以脂香亦比較濃郁，而澳洲牛肉就以瘦肉居多，牛味較淡不過勝在唔會覺得油膩。
 

西班牙白豚（放題套餐免費供應）

除咗牛肉之外，每個放題套餐仲包埋任食西班牙白豚肉。色澤粉嫩肉汁鮮甜，而且無一般豬肉嘅臊味。
 

大面子（新張期間晚市免費供應）

餐廳新張期間仲有特別優惠，就係18/2或之前光顧晚市放題，每人免費一件大面子韓牛！大面子其實即係韓牛嘅腰至大髀位，薄切至好似塊面咁大嘅牛肉。記得唔好灼太耐，咁先保留到牛肉嘅嫩滑口感同肉汁呀。
 

加錢食埋新鮮刺身

各款刺身

再貪心啲嘅話，仲可以加錢食埋唔同刺身，當中三文魚腩（$58）、赤蝦（$48）同帆立貝（$68）都有水準以上。其他例如墨魚（$48）、甜蝦（$48）、海膽（$188）亦相當新鮮。另外午市亦有刺身同魚生飯選擇。
 

講返放題，餐廳一角仲有唔少蔬菜、丸類同麵食，比較特別嘅有羽衣甘藍、蟲草花、台灣原味腸同芝士魚皮餃。全部都係任夾任食，食得肉多不妨食返啲蔬菜當中場休息。
 

而肉類就要用平板電腦落單，之後會用路軌直送到卡位旁邊。應該無論大小朋友都會覺得得意又過癮。
 

最後連大家嘅甜品胃都照顧埋！餐廳有Froyo機畀大家任擠，開飯仔採訪當日就有原味同朱古力味，冰凍清新唔過甜。再按自己喜好加埋唔同Topping，畫上一個色彩繽紛又甜蜜嘅句號。
 

大谷倉
元朗安寧路38號世宙商場地下26-27號舖
（身高90-120cm以小童價錢計算）

文、相、片：Cathy