唔少人去Cafe就係為咗忙裡偷閒，九龍城呢間新開嘅咖啡店就以日本嘅侘寂美學為概念，等大家有個空間可以安靜落嚟享受禪意。手沖咖啡特設冰搖版，提高酸甜感味道似果茶易入口。有時間以可以點杯手刷抹茶，欣賞茶師沏茶同體驗日本茶道。輕食同甜品亦有水準，推介辣花生醬雞柳窩夫，配搭有驚喜！
 

Sofi Coffee位於九龍城，由Logo到店裡面嘅枯山水園景都呼應日本禪學同侘寂美學（Wabi-sabi），加上空間感同燈光設計等，感覺真係幾似去咗日本咁！手沖咖啡有多款單品豆選擇，而意式咖啡就有兩款豆。Milk Coffee嘅會用House Blend，帶朱古力香同甜度較高；Black Coffee會用埃塞俄比亞單品豆，以明亮嘅柑橘風味為主。之後亦有可能按季節調整。
 

Hand-drip Coffee（$65起，冰搖+$10）

坊間手沖咖啡以熱飲為主，店主就特別製作冰搖手沖，令咖啡嘅甜度同酸度更明顯，味道似果茶易入口，適合初嘗精品咖啡或者手沖咖啡嘅朋友入門。手沖咖啡加冰用Shaker搖過後，口感更Creamy，味道反而更清爽。好似呢款咖啡師推介嘅墨西哥厭氧發酵處理法咖啡豆，入口先有類似士多啤梨嘅酸甜味道，之後有少少酒香，Aftertaste帶啲啲苦味，夏天飲好消暑。
 

有時間又鍾意抹茶嘅話就必點手刷抹茶，茶師特別挑選日本小山園四方之薫抹茶粉，皆因味道甘甜富旨味（Umami），製作薄茶口感清爽舒服。客人亦可以喺吧枱觀賞茶師製作薄茶嘅過程，先暖碗、用茶筅調膏、點茶，最後奉茶，聽到刷茶聲自己亦可以平靜心情。
 

Hand-whisk Matcha（$75，每日限量供應）

飲之前可以先飲冰水清洗味蕾，然後雙手捧起，欣賞香港職人製作嘅茶碗，亦可以睇到薄茶綿密嘅泡沫同聞到清幽嘅茶香。呢款抹茶的確有一股甘甜香，同類似紫菜嘅旨味，飲落口感柔滑，回甘生津。不過建議大家趁熱飲，凍咗就會有少少苦味啦。
 

古味辣花生醬雞柳窩夫配莎莎醬（$108）

古味辣花生醬雞柳窩夫靈感嚟自其中一位老闆嘅家傳食譜，用花生醬加上辣椒醬調配出古早味辣花生醬，配搭雞柳同火箭菜。而窩夫亦非一般窩夫，而係以印度薄餅用窩夫機壓出酥皮效果。入口先食到花生醬嘅香甜，然後辣味湧出，最後又有窩夫酥皮香中和返，味道豐富，雞柳亦幼嫩彈牙。食到一半可以加上莎莎醬，酸香微辛可以解膩，亦增加香味層次！
 

 

泰式香葉炒新豬肉刈包（$78）

講到九龍城唔少人都會諗起泰國菜，餐廳亦特別設計咗呢款純素泰式香葉炒新豬肉刈包，刈包用Panini機壓成波浪紋，外微脆內綿密。新豬肉加上九層塔、紅菜頭、酸梅醬等炒成酸辣鹹香嘅餡料，加上生菜整體惹味又清爽。而且用紙包住方便大家用手食，旁邊嘅青檸係畀大家食到有少少膩嘅時候加青檸汁上去，立即醒胃。
 

Tiramisu w/ House Espresso & Secret Wine（$60）

自家製Tiramisu用咗兩款咖啡酒，其中一款加入帶朱古力香嘅House Blend。整體口感軟滑綿密，Mascarpone忌廉芝士嘅奶香、甜味，咖啡嘅朱古力香都糅合得啱啱好，最後散發出淡淡酒香，令人回味。碟上嘅朱古力醬亦係呼應Cafe長走廊盡頭一角嘅枯山水園景。
 

Tofu Cheese Cake w/ Black Sesame Sauce（$55）

建議先試豆腐芝士蛋糕原味，豆腐嘅黃豆香同忌廉芝士嘅淡淡酸味估唔到又幾夾，口感輕盈柔滑，配鬆脆嘅餅底簡單好味。然後按自己喜好淋上黑芝麻醬，芝麻香濃郁而且甜度適中，唔會完全蓋過豆腐香又增加味道層次！值得一提小店用本地豆腐同芝麻製作，希望製作出清爽無負擔嘅甜品。
 

Sofi Coffee
地址：九龍城太子道西428-430號地舖

文、相：Cathy