放假日一起身可以食到一餐豐富嘅Brunch真係好幸福～今期搜羅咗幾間唔同國家菜式嘅早午餐畀大家，有香港人最愛嘅日本菜、任食Pizza、暮夜早午餐及摩登中東餐廳，好有特色！

目錄

壽喜燒五道菜週末早午餐 壽喜燒 伊勢熊

圖: kyanxx

有冇諗過Brunch都可以食到壽喜燒呢？尖沙咀呢間由日籍大廚親自主理嘅壽喜燒料理專門店以創新獨門佐料醬汁及極上和牛配搭傳統壽喜燒作招徠，最近推出壽喜燒五道菜週末早午餐～套餐包兩款前菜、茶碗蒸、壽喜燒肉食、五款日本季節蔬菜、味噌湯、漬物、飯食及甜點，主食推介揀日本和牛，油脂豐富配埋香甜嘅醬汁冇得輸。如果唔食牛另外仲有北海道四元豚同德島縣阿波酢橘雞揀㗎。

$248任食Pizza The Pizza Project

主打優質手工薄餅，Giro Brunch可以喺90分鐘內任叫薄餅及飲料，啱晒大胃王！每位食客將可享受一人份的前菜，包括各式冷切肉拼盤、香炸水牛芝士及意式炸飯球，然後就可以迎接無限量供應嘅各式精選招牌薄餅。如肉腸薄餅、卡邦尼薄餅、四重芝士薄餅、黑松露火腿薄餅同蘑菇雅枝竹薄餅等， 呢度嘅麵團用六種唔同麵粉搓成，預先發酵一日，烤出嚟嘅薄餅外脆內軟，空氣感極重，食落輕盈啲。

暮夜早午餐 aqua  

叫得早午餐，通常大家都以為係早餐至午餐呢段時間食，但呢間被選為「全球最佳夜景」餐廳之一嘅Aqua就反傳統，喺每周六晚推出暮夜早午餐。佢哋嘅早午餐就以日式同意式美食為主，如前菜小牛肉配鮪魚醬及日式烤雞串、主菜諾瑪義大利麵及義式獵人雞飯等。最正係有無限量添飲嘅酒類同埋駐場DJ及驚喜舞蹈表演，保證令你樂而忘返。

摩登中東餐廳 FRANCIS west

中東菜Brunch你又食過未？中環蘇豪區呢間中東菜推出全新週末及節假日早午餐，融合咗地中海同非洲風味及歷史悠久嘅阿拉伯烹飪方式，令人驚喜。前菜拼盤包括必食嘅摩洛哥石板烘焙薄餅麵包，熱辣辣出爐帶香濃小麥香，配埋鷹嘴豆泥同摩洛哥辣醬食好夾～主菜幾推介海鮮北非小米，以新鮮河蝦、小魷魚、大蜆、醃製檸檬同番茄製成，好開胃。甜品有傳統中東甜品Knafeh，將脆炸馬蘇里拉奶酪絲浸於糖漿中，再撒上開心果碎，幾有層次～

文: Yanica