尖沙咀一向有好多餐廳選擇，尤其是海港城，幾乎每個月都有新面孔。嚟緊又會開幾間過江龍餐廳，似乎幾有睇頭喎！睇下呢3間即將開業嘅過江龍有乜特色先！

日本爆cream奶油麵包 八天堂Hattendo

來自日本廣島縣三原市，以奶油麵包做主打，每日限量發售以保持品質，賣完即止。麵包口感軟熟、而且cream味濃，所以好受食客歡迎。2015年八天堂登陸台灣，開舖2-3個鐘頭就已經售罄。

主打嘅奶油麵包有吉士、生奶油、抹茶、紅豆、朱古力以及草莓6款口味。

圖：4.bp.blogspot.com

今次喺海港城開香港首間店舖，大約喺9月或10月開業，嗜甜友，期待下！

八天堂
地址：尖沙咀廣東道25號海港城港威商場地下

米蘭小店歎脆邊薄餅 Paper Moon

米蘭嘅呢間巷仔小店好有實力，喺 Tripadvisor 網站見到食客們好評如潮之餘，仲有蘇民峰、蕭亞軒、鄧達智、葉澍堃等各界名人加持，難怪可衝出意大利，喺香港開店啦！

新店一大特色，就係引入價值6位數字嘅意大利pizza焗爐，重達一噸，相信係用嚟炮製店子招牌嘅pizza，yummy！

圖：Paper Moon

坐窗口位嘅話仲可以睇到維港特大海景添，齋食個view都飽晒！

圖：Paper Moon

新店現時裝修中，最遲會喺9月尾開業。

圖：Paper Moon

Paper Moon
地址：尖沙咀廣東道25號海港城海運大廈3樓301號舖

米芝蓮一星拉麵登陸九龍 蔦

圖：Mia求好運

日本第一間榮獲米芝蓮一星嘅拉麵店「蔦」雖然已經喺銅鑼灣登龍街開舖，但係「蔦」勢頭咁勁，日日都吸引咗大批拉麵迷去試食，所以「蔦」會喺尖沙沮海港城再開分店，方便一班九龍人新界人啦！

推介味玉鹽味拉麵。湯底用咗全雞、蜆、魚乾等食材，並以慢火熬製9粒鐘而成，滴滴都係精華；拉麵喺店子自家製作；叉燒用豬肩部位，並且即叫即切，以免流失肉汁。另有竹筍、白蔥、紫洋蔥、溏心蛋、松露醬及松露油等食材，諗起都流晒口水。

圖：chiudaiwei

蔦 Tsuta Ramen
地址：尖沙咀廣東道25號海港城

文：Joy