呢間來自新加坡嘅雞蛋料理專門店，繼旺角店及北角店後，短短幾個月就開埋第三間分店啦！新店選址元朗，係新界區首店，而且仲新增咗四款加入雞蛋元素嘅意粉，各位雞蛋控們要去嚐鮮喇～
餐廳供應正宗日式玉子料理，包括全日早餐、沙律、三文治、丼物、蛋包飯同甜品等等，連埋今次新增嘅意粉menu，全部都係用日本沖繩直送最新鮮嘅雞蛋，蛋黃呈鮮橙色㗎，而且價錢合理，難怪每間分店都要排隊啦。
特製TKP・海蝦明太子醬冷意粉($92)
有去過其他店嘅朋友應該都有見過佢哋嘅終極TKG生雞蛋拌飯，今次就推出呢個特製TKP 意粉。TKP即係指生雞蛋拌意粉，全名係Tamago Kake Pasta，係日本而家最新嘅流行料理。呢度就將TKP配上幼身冷意粉，有淡淡明太子鹹香及紫蘇葉香氣，味道又幾開胃。另外仲有熱食嘅海蝦明太子忌廉意粉添。
煙肉明太子忌廉意粉($78)
用炸雀巢盛載溫泉蛋，流心蛋黃配埋香濃忌廉，加埋鹹香嘅明太子及煙肉，真係食到停唔到口呀！
日式拿坡里義大利麵($78)
想食Fresh啲，可以試吓呢個日式拿坡里義大利麵，加入番茄味道酸酸甜甜，而腸仔都係選用維也納香腸～
焦糖香桃梳乎厘班戟($68/兩件)
想平食梳乎厘班戟，可以選擇下午2:30至6:00呢段時間嚟，$68就可以食到兩件～班戟口感鬆軟之餘唔會太空氣感，而且蛋香都好濃添。
提提大家，新增四款日式意粉只限元朗及北角店供應，記得唔好去錯呀。
地址: 元朗朗日路9號形點一期2樓2060號舖
文: Yanica
相、片: Calvin Kwok