6月輪到係父親節嘅月份，之前同大家介紹過自助餐嘅選擇，今次就講下糕點啦。無獨有偶，有幾間餅店都以酒嚟做主題，如果你父親大人好酒嘅，就啱晒喇。

威士忌造型蛋糕   東海堂

呢個以日本威士忌酒樽造型嘅蛋糕，連樽連酒箱，係幾型嘅。不過必須要提醒大家，成個蛋糕係一啲酒味都冇㗎！佢係朱古力忌廉蛋糕嚟，內裡有朱古力杏仁脆脆呀、朱古力海綿蛋糕同朱古力牛油蛋糕咁囉。

冰桶紅酒造型蛋糕   聖安娜

呢間餅店嘅蛋糕造型就用咗紅酒嘅樣，仲有冰桶裝住添，不過同樣係冇紅酒味嘅。而係一個休果忌廉蛋糕，外層嘅冰桶就係朱古力蛋糕嚟，至於啲冰粒呢就係清新嘅檸檬啫喱。

干邑閃電泡芙  DALLOYAU

呢個泡芙雖然就唔係成支酒咁嘅樣，但就係干邑味呀。傳統法式泡芙作為基底，加上燕尾服做面，中間就填滿特優干邑忌廉，醇香味美。

焦糖威士忌泡芙  L’Éclair de Génie

呢間閃電泡芙專門店亦特別為父親節創作咗一款N°271 焦糖威士忌泡芙。以海鹽焦糖、咖啡同威士忌調製成軟滑忌廉，泡芙上面仲用埋滴管注滿威士忌，輕輕唧一唧就可以滲晒入泡芙度。成件食起上嚟，甜甜地、苦苦地又鹹鹹地，仲辣辣地添，層次相當豐富，酒味亦夠濃郁。

文：Kar