潮流興懷舊，仲要懷很舊的舊。尖沙咀最近新開咗間打邊爐「舊店」，灰色仿水泥磚牆、經典綠色窗框同木櫈、公雞餐具，好似時光倒流返返去六、七十年代咁。唔止裝修，就連食物都好懷舊，火鍋湯底係老火湯，就連煎釀三寶同豬油渣炒飯都有得食！

(左)枝竹魚頭鍋、(右)濃湯花膠雞鍋

 粉葛赤小豆煮唐排鍋

 椰子嫩雞鍋

餐廳主打自家製嘅老火湯湯底，包括有濃湯花膠雞鍋、枝竹魚頭鍋、老成都麻辣鍋等，另外仲會按時令每日熬製兩款養生老火湯，好似健脾祛濕嘅粉葛赤小豆煮唐排鍋、滋潤養神嘅椰子嫩雞鍋咁。前者鮮濃，後者鮮甜。建議大家喺落料淥嘢之前，可以先飲一碗呀~

火鍋配料嘅食材亦大部分嚟自香港本土，打邊爐唔少得肥牛，牛魔王就更加要呢個「牛皇拼盤」先至可以滿足到。一個拼盤有多個唔同部位：極級本地手切靚肥牛、手切安格斯牛頸脊、安格斯牛柳粒、牛骨髓、白牛柏葉同薄切金錢肚。

至於豬肉同羊肉，就分別有油花細緻嘅日本黑毛豬腩片，同淡淡羶香，入口煙韌嘅蒙古羊肉片。

想個湯再鮮甜啲，就梗係加啲海鮮配料啦，大約有十幾款選擇，例如珊瑚蚌、貴花蚌、蠔等都有。

話明懷舊主題，當然有懷舊嘅配料啦~ 陳皮魚蛋、百花釀油條、手打滑料夠舊未？魚蛋加入陳皮，辟除腥味外，仲有微微果香；墨魚滑釀入油炸鬼中，口感爽滑；手打滑料則係每日人手新鮮製作，有蟹籽墨魚滑、蝦籽新蝦滑、陳皮牛肉滑同埋海味鯪魚滑。

通常每次打邊爐，都會有啲心急仔，成日都等唔切啲湯底滾，可以叫住幾款經典香港小食畀佢哋食住先呀。食內臟嘅話可以揀招牌炸大腸，炸到層皮好鬼脆，會食唔停口。

豬油渣醬油炒飯，少年如果你太年輕冇食過，真係要試試呢樣香港老嘢。雖然係好月巴，用豬油渣同本地醬油、蔥花等調味，但確係好香口，間唔時食一碗半碗冇緊要啦科科。

飲品繼續貫徹老香港嘅主題，有竹蔗茅根、酸梅湯同夏枯草幾款清熱嘢飲啊。

老港情懷
地址：尖沙咀天文臺道8號地舖

文：Kar
相、片：Tom Li